Golfvellir á Spáni: í Cadíz nr. 9 – La Reserva

La Reserva golfklúbburinn og völlurinn er af sömu gæðagráðu og nágrannarnir: Sotogrande, Valderrama og San Roque, en af þessum lúxus-kvartett var Golf 1 bara búið að kynna Valderrama sjá HÉR:

La Reserva er hannað af bandaríska golfvallarhönnuðinum Cabell B. Robinson og opnaði dyr sínar fyrir golfleik 2004. Þrátt fyrir að þetta sé ungur völlur gætu alþjóðleg mót með góðu móti verið haldin þar.

Völlurinn er staðsettur milli tveggja dala sem eru eins og Y í laginu og þegar völlurinn var byggður voru allir runnar, tré og plöntur fjarlægðar og síðan endurgróðursettar.

La Reserva er gríðarlega langur völlur um 7.400 yarda af öftustu teigum (6766 metra), en á móti kemur að allar brautir vallarins eru víðar.  Voldugur er orðið sem kemur í hugann þegar hugsað er til La Reserva. Flatirnar eru líka stórar og geysihraðar, svipað og á Valderrama. Þannig að jafnvel þótt maður sé inni á tilskyldum höggafjölda á enn eftir að leysa úr brotum og hröðum flötunum og þrípútt ekki óalgeng.

Verið er að hanna 2. völl á Reserva og er hönnuðurinn enginn annar en Ryder Cup fyrirliði Evrópu 2012, José Maria Olazabal.

Loks mætti geta að La Reserva þykir 7. besti golfvöllur Spánar en sá 55. besti í Evrópu.

Upplýsingar um völlinn:

Heimilisfang: Reserva Club de Golf, Avda. de la Reserva s/n, Sotogrande 11310, Spánn

Sími: +34 956 785 252