Golfvellir á Spáni: í Cádiz nr. 14 – Villa Nueva

Villa Nueva Golf Resort er í hinu svonefnda Barrio Jarana í Puerto Real, sem er lítill bær í Cádiz héraði, 10 mínútur frá bænum Cádiz og aðeins 2 km frá ströndinni.

Villa Nueva býður upp á 18 holu par-72 golfvöll, þar sem jafnvel mest krefjandi kylfingar fá eitthvað fyrir sitt. Tæknilega er erfiðleikastuðull vallarins mismunandi allt eftir teiga- og holustaðsetningum, líkt og á mörgum öðrum  völlum, en kannski engum meira en einmitt þessum.

Layout-ið er vel úthugsað.  Það sem er einna fallegast á vellinum er útsýnið sem maður hefir yfir bæinn San Fernando þegar farið er af 13. flöt.  A.m.k. 5 hundslappir eru á vellinum þ.á.m. 14. braut.  Vatn kemur við sögu á 7 holum þ.á.m. þeirri sem e.t.v. er eftirminnilegust en það er 11. brautin, sem er par-3 (102 metrar af rauðum og 139 af gulum). Nokkrar brautir eru líka þannig að slá verður „blindandi“ á þær þ.e. maður sér ekki flaggið. T.a.m. á 16. braut verður maður að slá í gegnum trjáumvafða brautina áður en maður sér flötina sem blasir við eftir að farið er niður nokkurn halla.

Það eru flatirnar sem eru algjörlega í sérklassa, geysihraðar og það er það sem verður flestum líklega eftirminnilegast eftir spila á vellinum.

Klúbbhúsið er lítið, en smart og það er golf pro-shopið líka og maturinn er fyrirtaks, enda staðurinn rekinn af Þjóðverjanum Oliver Günther.

Upplýsingar:

Heimasíða: www.villanuevagolf.com, en komast má á síðuna með því að smella HÉR:  

Heimilisfang: C/Verbena s/n Barrio Jarana, Puerto Real, 11510 Cádiz.

Sími: + 34 956 474084/4130.

Fax: +34 956 474117

Tölvupóstur: oliver.gunther@vincciholteles.com