Golfvellir á Spáni: El Valle í Murcia

Hér er komið að kynningu á El Valle, sem er einn golfvallanna 4, þar sem 2. stig úrtökumóts fyrir Evrópumótaröðina fer fram dagana 2.-5. desember n.k. Birgir Leifur Hafsteinsson, GKG, mun keppa á Costa Ballena golfvellinum, sem var kynntur fyrr í vikunni. Á morgun verður svo kynning og myndasería frá 4. og síðasta vellinum sem keppt er á;  Las Colinas í Alicante.

El Valle er miðlungs lengdar golfvöllur, par-71 hannaður af Jack Nicklaus og staðsettur í eyðimörk í Murcia á Spáni.

Nánar tiltekið er völlurinn milli Banos og Mendigo, nærri Murcia-San Javier hraðbrautinni. Hægt er að komast í miðbæ Murcia á aðeins 10 mínútum og á yndislegar strendur Mar Menor og Costa Calida. La Manga golfklúbburinn (en á einum golfvalla  þess klúbbs fer úrtökumót 2. stigs fyrir Evrópumótaröðina einnig fram) er í mestu nálægð. Alicante flugvöllurinn er í 40 mínútna fjarlægð og San Javier flugvöllurinn í aðeins 15 mínútna keyrslu frá vellinum.

El Valle er golfvöllur sem hentar nákvæmum kylfingum, það reynir öðru fremur á að staðsetja sig rétt en minna vægi er á kraftagolf og högglengd.  Eitt af einkennum vallarins eru sandglompurnar, en við hönnun vallarins var eyðimerkurstaðsetning vallarins nýtt til hins ýtrasta og er mikið er um sandglompur á vellinum.  Allar náttúrlega hindranir eru jafnframt nýttar eins og klettanibbur sem standa upp úr og kaktusar og allskyns eyðimerkurgróður. Mörgum flatanna svipar til kóróna, þ.e. þær  skaga upp úr upphækkaðar og grænar umvafðar sandglompum. Það reynir því öðru fremur á stutta spilið og hugmyndauðgi í höggum er verðlaunuð. Jafnframt eru tvö vötn á vellinum, sem koma nokkuð við sögu.

Til þess að komast á heimasíðu El Valle, smellið hér: EL VALLE – MURCIA- SPÁNI