Gleðilegt sumar!

Í dag er Sumardagurinn fyrsti, frídagur sem markar upphaf sumars, þó víða um land sé ekki sérlega sumarlegt. Fyrir Norðan á Akureyri var t.a.m. snjókoma í morgun.  Það sama er að segja vestan- og austanlands, víða enn snjór yfir golfvöllum og sumarið virðist víðsfjarri þó dagatalið segi annað.

Hér sunnanlands hefir sólin gægst feimnislega fram og það hefir verið hægt að spila golf bæði á Kirkjubólsvelli í Sandgerði og Húsatóftavelli í Grindavík, en þeir tveir vellir eru opnir.

Ýmsir klúbbar voru síðan með innanfélagsmót: GKJ menn héldu mót á Hlíðavelli í Mosfellsbæ og það sama er að segja um GHR – á Hellu fór fram  Vorkomu-mótið, þar sem leikformið var höggleikur með forgjöf.  Félagar GHH á Hornafirði brugðu sér í snærisleik

Nú á laugardaginn n.k., 27. apríl 2013 (3. sumardag) eru í boði tvö mót fyrir golfþyrsta, vetrarþreytta kylfinga: Vormót nr. 3 hjá Golfklúbbi Sandgerðis (GSG)  og Opna Golfbúðin hjá Golfklúbbi Suðurnesja (GS). 

En svo fer þetta nú líklega að koma um allt land, golfvellirnir fara að opna hver á fætur öðrum og kylfingar geta glaðst yfir þeim forréttindum að geta spilað golf á hverjum degi… allan sólarhringinn ef út í það er farið.

Golf1 óskar lesendum sínum og reyndar kylfingum öllum gleðislegs golfsumars!