Ragnheiður Jónsdóttir | desember. 31. 2017 | 18:00

Gleðilegt nýtt ár 2018!

Golf 1 óskar lesendum sínum svo og öllum kylfingum og landsmönnum nær og fjær gleðilegs nýs árs 2018, með mörgum gleðistundum í golfi á komandi ári.

Golf 1 hefir nú verið starfandi í rúma 75 mánuði, þ.e. 6 ár , 3 mánuði og 6 daga og hafa á þeim tíma birtst um 18.300 greinar, en þar af voru um 2100 skrifaðar á s.l. ári, 2017 sem þýðir u.þ.b. 6 greinar um golf að meðaltali á hverjum einasta degi 2017. Stefnt verður að því að auka greinaskrif á næsta ári.

Kylfingar innanlands, sem og vaxandi fjöldi erlendra kylfinga hafa tekið þessum yngsta golffréttavef Íslands framúrskarandi vel og umferð um vefinn ekkert nema aukist frá því hann hóf starfsemi 25. september 2011.

Á árinu var haldið áfram að skrifa greinar um Ísland, íslenskt golf og það sem íslenskt er á ensku og þýsku. Golf 1 hefir nokkra sérstöðu, þar sem hann er eini golfvefurinn í heiminum , sem skrifar á ensku og þýsku um íslenskt golf. Einnig er stefnt því að auka skrifin á þessum hluta Golf 1 á komandi ári. Þess ber að geta að á sama tíma og skrifað hefir verið á ensku og þýsku á Golf 1 um íslenskt golf, hefir erlendum golfferðamönnum fjölgað, sem sækja Ísland og íslenska golfvelli heim.

Nokkra gleði vekur það jafnræði sem er í lesendahóp Golf 1, þar sem karlkylfingar eru þó enn aðeins í meirihluta lesenda eða 60% á móti 40% kvenkylfinga. Þessi prósentutala mætti gjarna endurspeglast í þátttöku kvenkylfinga í mótum sem og í aukinni þátttöku ungra stelpna í golfi. E.t.v. stuðlar jafnræði í umfjöllun um golfleik beggja kynja að því að áhugi kvenna á þátttöku í golfi glæðist og eykst. Ábyrgð fjölmiðla er þar mikil.

Það sem ber hæst á golfárinu sem er að líða er frammistaða Ólafíu Þórunnar „okkar“ Kristinsdóttur GR, íþróttamanns ársins 2017 á Íslandi og fyrsta kylfingsins, sem hlýtur þann titil og gerir okkur öll svo óendanlega stolt með frábærum árangri sínum í hverju LPGA mótinu á fætur öðru, sem svo margir fylgjast spenntir með. Það er vonandi að vegferð hennar á komandi ári verði jafn glæsileg og á árinu sem er að líða. Ólafía Þórunn er frábær og mikilvæg fyrirmynd yngri kynslóð kylfinga, aðallega ungra stúlkna sem nú stunda golf í auknum mæli.

En aðrir íslenskir kylfingar voru einnig að slá í gegn erlendis. Valdís Þóra Jónsdóttir, GL, kylfingur á LET og LET Access var einnig tilnefnd til íþróttamanns ársins og náði á árinu sem er að líða besta árangri íslensks kylfings á stórri mótaröð, LET, þegar hún landaði 3. sætinu (bronsinu) á Sanya Open í Kína í nóvember sl.

Guðrún Brá Björgvinsdóttir, GK, og Berglind Björnsdóttir, GR reyndu fyrir sér úrtökumóti fyrir LET og munaði sáralitlu að Guðrún Brá  næði inn á mótaröðina, en hún náði að komast á 2. stigið og síðan spila í lokaúrtökumótinu.  Það er aðeins tímaspursmál hvenær við eignumst 4. og 5. íslensku konunarnar á mótaröð þeirra bestu í Evrópu!

Axel Bóasson, GK og Haraldur Franklín Magnús, GR sem og Andri Þór Björnsson, GR og Guðmundur Ágúst Kristjánsson spiluðu á Nordic League mótaröðinni.  Axel var valinn leikmaður ársins á mótaröðinn og Haraldur Franklín nýliði ársins.  Guðmundur Ágúst fékk að spila á Nordea Masters á Evrópumótaröðinni eftir frábært gengi í úrtökumóti fyrir mótið!

Eins tókst Aron Snæ Júlíussyni, GKG að komast inn á 2. stig úrtökumóts fyrir Evrópumótaröðina. Birgir Leifur Hafþórsson, GKG, náði þeim stórglæsilega árangri að sigra í fyrsta skipti á ferli sínum á Áskorendamótaröð Evrópu. Það var á Cordon Golf Open, sem fram fór 31. ágúst – 3. september í Golf Blue Green de Pléneuf í Val André í Frakklandi.

Golf 1 fylgdist nú, sem á undanförnum árum, með 16 íslenskum kylfingum, sem spila í bandaríska háskólagolfinu og er það mesta breidd kylfinga í bandaríska háskólagolfinu, sem íslenskur golffréttamiðill er að fylgjast með. Íslenskum kylfingum í bandarísku háskólagolfi fer jafnvel fjölgandi. Er til efs að nokkur þjóð eigi hlutfallslega jafnmarga kylfinga í bandarísku háskólagolfi miðað við höfðatölu.

Þeir kylfingar sem Golf 1 fylgist með eru í stafrófsröð: Arnar Geir Hjartarsson, GSS, Missouri Valley; Birgir Björn Magnússon, GK, Bethany College, Kansas;  Bjarki  Pétursson, GB, Kent State; Björn Óskar Guðjónsson; GM, Louisiana Lafayette; Egill Ragnar Gunnarsson, GKG, Georgia State: Eyþór Hrafnar Ketilsson, GA, Faulkner; Gísli Sveinbergs, GK, Kent State; Gunnhildur Kristjánsdóttir, GK, Elon;  Hafdís Alda Jóhannsdóttir, GK, IUPUI (Indiana University-Purdue University Indianapolis);  Helga Kristín Einarsdóttir, GK, Albany; Ragnhildur Kristinsdóttir, GR,  Eastern Kentucky; Rúnar Arnórsson, GK, University of Minnessota;  Sigurlaug Rún Jónsdóttir, GK, Drake; Stefán Þór Bogason, GR; Florida Institute of Technology; Stefán Sigmundsson, GA, Bethany College, Kansas; Særós Eva Óskarsdóttir, GKG, Boston University.

Á næsta ári munu síðan Arna Rún Kristjánsdóttir, GM og Saga Traustadóttir, GR  bætast í hóp íslenskra kylfinga í bandarísku háskólagolfi, en Arna Rún hefir samið við Grand Valley State University og Saga við Colorado State.

Þá eru kylfingarnir okkar í bandaríska háskólagolfinu farnir að fylla 2. tuginn.

En það er ekki bara á golfvellinum í íslensku golfi sem afrekin í golfi vinnast… einnig í golfstjórnsýslunni. Haukur Örn Birgisson, forseti Golfsambands Íslands er verðandi forseti Golfsambands Evrópu. Það er glæsilegt og vegur íslensks golfs e.t.v. aldrei meiri en nú í ár.

Stefna Golf 1 er óbreytt eftir sem áður verður leitast við að hafa umfjöllun Golf 1 bæði um karl- og kvenkylfinga; bæði afrekskylfinga og almenna kylfinga, öldunga, sem og hina yngri og hvað hina yngri snertir mun Golf 1 að sjálfsögðu, líkt og undanfarin ár vera áfram sterkur miðill í umfjöllun um glæsileg börn og ungmenni, sem eru innan íslenskrar golfhreyfingar. Eflaust eigum við fremur fyrr en síðar eftir að sjá mörg þeirra á helstu mótaröðum heims!!!

Golf 1 var 2017 með fréttir um öll meistaramót golfklúbba á Íslandi 2017.

Kylfingar, íslenskir sem erlendir, virðast kunna að meta breidd í fréttaflutningi um golf. Hana mun Golf 1 reyna að færa sístækkandi hópi lesenda sinna.

Ólíkt því sem viðgengist hefir undanfarin 6 ár mun Golf 1 ekki fara í nýársdagsfrí og munu nýjar golffréttir birtast strax á 1. degi nýs ári 2017.

Kærar þakkir fyrir frábærar viðtökur – Hafið það gott! – Komist öll slysalaust yfir ársskiptin með bestu óskum um heilbrigði og hamingju 2018.

Ragnheiður Jónsdóttir, ritstjóri Golf 1.