Ragnheiður Jónsdóttir | maí. 5. 2015 | 22:00

GL: Skemmtileg auglýsing f. Garðavöll!

Blaðamaður Golf 1 varð var við sérkennilega vörubifreið sem keyrði í gegnum Hafnarfjörð.

Á einni hlið vörubifreiðarinnar var gríðarstór og falleg auglýsing fyrir Garðavöll á Akranesi.  Skemmtileg leið til að auglýsa golf og fallegan, góðan golfvöll sem Garðavöllur er!

Upphófst mikill eltingaleikur um allan Hafnarfjörð til þess að bíða þess að vörubifreiðin stoppaði þannig að hægt væri að taka mynd af Leynis-auglýsingunni flottu.

Á einum stað missti blaðamaður sjónar á vörubifreiðinni og nú voru góð ráð dýr – hafði hún farið niður á höfn, áfram í átt að Keilisvelli eða var hún á leið til Keflavíkur?

Farið var fyrst hálfa leiðina til Keflavíkur svo niður á Hvaleyrina og var nú blaðamaður orðinn býsna vondauf um að finna vörubifreiðina, en þá fyrir kraftaverk birtist hún á höfninni í Hafnarfirði, þar sem hún var við eitt skipið.

Golf 1 keyrði beinustu leið niður á höfn, en var þar stoppuð af hliðverði sem harðneitaði að hleypa einhverjum óviðkomandi inn á hafnarsvæðið og alls ekki til þess að taka mynd af vörubifreiðarauglýsingu – heldur léleg afsökun fyrir að fá að hnýsast um hafnarsvæði Hafnarfjarðar.

En Golf 1 til mikillar gleði kom hress Skagamaður á annarri vörubifreið fljótt að hliðinu og sagðist ætla að biðja hina vörubifreiðna að stoppa þegar hún kæmi frá hafnarsvæðinu – sagði hann að þess yrði ekki lengi að bíða.

Og það gekk eftir, ökumaður ÞÞÞ, sem keyrði á flottu Garðavallar-auglýsingar vörubifreiðinni sagðist heita Einar og leyfði góðfúslega myndatöku af vörubifreið sinni, sem hér fylgir!