GG: Nýr 18 holu Húsatóftavöllur tekinn í notkun í dag – 6. júlí 2012

Stjórn og vallarstjóri Golfklúbbs Grindavíkur hafa ákveðið að í dag, 6. júlí verði Húsatóftavöllur opinn sem 18 holu golfvöllur.

Samhliða þessu verður tekin upp rástímaskráning á golf.is. Félagar í GG hafa 3 daga fyrirvara á skráningu á meðan aðrir gestir hafa dags fyrirvara. Með þessu hverfur óvissa fyrir gesti Húsatóftavallar varðandi bókanir á völlinn og betri yfirsýn með skráningum og umferð um völlinn.

Kylfingar eru þó beðnir um að sýna umburðarlyndi gagnvart nýju brautunum þar sem spretta á þeim hefur ekki verið samkvæmt væntingum og áætlunum vegna mikilla þurrka síðustu vikur. Vegna þessa verða leyfðar færslur á sáðu svæði á brautum 5, 6, 7, 8 og 18 (þrjár þeirra eru par 3 holur).