GG: Björgvin og Sigurður Óskar sigruðu á Sjóaranum síkáta

Sjóarinn Síkáti – Þorbjörn HF, hið vinsæla golfmót Golfklúbbs Grindavíkur var haldið s.l. laugardag (laugardaginn 4. júní 2016) í tengslum við bæjarhátíð Grindvíkinga, Sjóarann síkáta, sem fram fór í ár 3.-5. júní 2016.

Ræst var út af öllum teigum samtímis  kl. 08:30.

Eins og undanfarin ár var engu til sparað til að gera mótið sem veglegast. Uppistaða vinninga var sjófrystur fiskur og   Grindvíkingar sannarlega höfðingjar heim að sækja.

Keppnisfyrirkomulag var almennt og veitt verðlaun fyrir efstu 3 sætin í punktakeppni og fyrir besta skor.

Þátttakendur voru 76 og þar af luku 72 leik; þar af  6 kvenkylfingar og af þeim stóðu Hrefna Harðardóttir, GM sig best en hún var með flesta punkta 34 og var þar að auki ein af 3 sem var á besta skorinu í kvennaflokki eða 94 höggum.  Hinar tvær sem einnig léku á 94 höggum voru heimakonan Svava Agnarsdóttir, GG og Björg Guðrún Bjarnadóttir, GM.

Á besta skorinu í Sjóaranum síkáta var Björgvin Sigmundsson, GS, en hann lék Húsatóftavöll á glæsilegum 2 undir pari, 68 höggum – á skollalausum hring þar sem hann fékk 4 fugla, 13 pör og 1 skramba.

Efstu menn í punktakeppni með forgjöf voru eftirfarandi:

1 Sigurður Óskar Waage GM 10 F (16 23) 39 punktar
2 Bjarni Andrésson GG 8 F (18 21) 39 punktar
3 Ásgeir Ásgeirsson GG 4 F (16 21) 37 punktar

Til þess að sjá lokastöðuna að öðru leyti SMELLIÐ HÉR: 

Dregin voru út verðlaun úr skorkortum viðstaddra í mótslok.