Bjarki Pétursson, GB. Photo: Golf 1
Ragnheiður Jónsdóttir | febrúar. 7. 2013 | 08:40

GB: Bjarki Pétursson er íþróttamaður Borgarfjarðar – 3. árið í röð!

Bjarki Pétursson, GB,  var valinn íþróttamaður Borgarfjarðar árið 2012 á Íþróttahátíð UMSB, sem fram fór í Íþrótamiðstöðini í Borgarnesi s.l. laugardag, 2. febrúar 2013.

Alls fengu 18 íþróttamenn atkvæði í kjörinu. Í 2. sæti varð  skákkonan Tinna Kristín Finnbogadóttir, í 3. sæti Harpa Hilmisdóttir  úr Skallagrími fyrir badminton, í 4. sæti Konráð Axel Gylfason úr hestamannafélaginu Faxa fyrir hestaíþróttir og í 5. sætinu varð Sigmar Páll Egilsson körfuknattleiksmaður úr Skallagrím.

Þetta er 3. árið í röð sem Bjarki er kjörinn íþróttamaður Borgarfjarðar og er hann vel að útnefningunni kominn.

Bjarki er afrekskylfingur úr Golfklúbbi Borgarness (GB) og varð m.a. klúbbmeistari 4. árið í röð, 2012, auk þess sem hann gerði sér lítið fyrir og fór holu í höggi í meistaramótinu!

Árið 2012 spilaði Bjarki bæði á Unglingamótaröð Arion banka og á Eimskipsmótaröðinni.  Hann vann 1. mótið á Unglingamótaröðinni uppi á Skaga, sem og 3. mótið í Korpunni.

Bjarki lék einnig á nokkrum mótum erlendis 2012, tók m.a. þátt í Finnish Amateur Championship dagana 16.-18. ágúst.

Þá var Bjarki í verðlaunasæti (3. sæti) í einstaklingskeppninni á European Boys Challenge Trophy, sem fram fór í St. Sofia Golf & Spa, í Búlgaríu dagana 20.-22. september s.l.

Sjá má viðtal, sem Golf1 tók við Íþróttamann Borgarness 2012 með því að SMELLA HÉR: