GÁS: Sigurjón endurkjörinn formaður Golfklúbbs Ásatúns á aðalfundi

Síðastliðinn laugardag, 21. janúar 2012 var haldinn aðalfundur Golfklúbbs Ásatúns í golfskála klúbbsins, Snússu, að Flúðum. Sigurjón Harðarson var endurkjörinn formaður. Sjá má nýlegt viðtal Golf 1 við Sigurjón með því að smella HÉR: 

Eins var öll stjórn Golfklúbbs Ásatúns endurkjörin og er því óbreytt milli ára.  Sömu sögu er að segja um nefndir klúbbsins, þar er mannaskipan óbreytt.

Ásatúnsvöllur er ein af þessum perlum, sem kylfingar ættu endilega að spila hafi þeir ekki látið verða af því og færri sem vita að Ásatúnsklúbburinn er að verða einn af stærstu golfklúbbum Suðurlands vegna mikillar fjaraðildar, en félagsmenn 2011 voru 224, sem eru fleiri en í vinsælum klúbbum nálægra 18 holu golfvalla (Strandarvelli á Hellu 122, Kiðjaberginu 167 og Selsvelli að Flúðum, 175). Fjöldi klúbbmeðlima er svipaður í Ásatúni og á Selfossi (félagar í GOS voru 233 árið 2011) og þess utan aðeins Öndverðarnesið (295) og Vestmannaeyjar (337) með fleiri klúbbfélaga.