Komið og fylgist með Íslandsmótinu í höggleik 2012 dagana 26.-29. júlí á Strandarvelli, Hellu – Frír aðgangur og næg bílastæði!!!

Íslandsmótið í höggleik fer fram dagana 26.-29. júli og er þetta í 70. skipti sem keppt er um Íslandsmeistaratitil í golfi, en Golfsamband Íslands fagnar því einmitt í ár að 70 ár eru liðin frá því að sambandið var stofnað.  Eins og áður er mótið hápunktur golfsumarisns og Eimskipsmótaraðarinnar, enda keppt um eftirsóttustu titla í íslensku golfi.

Í ár fer  Íslandsmótið í höggleik fram á Strandarvelli og er í umsjá Golfklúbbs Hellu.  Golfklúbbur Hellu var stofnaður 22. júní 1952 og er því 60 ára á þessu ári. Aðalhvatamaður og stofnandi klúbbsins var Ásgeir Ólafsson og Helmut Stolzenwald á Hellu, en sonur hans Rúdolf Stolzenwald var fyrsti formaður golfklúbbsins.

Íslandsmótið í höggleik hefir á undanförnum árum skapað sér sérstakan sess meðal kylfinga þar sem lögð er áhersla á að búa til sem glæsilegasta umgjörð, sem hefir hvatt kylfinga til þátttöku.  Í ár taka flestir sterkustu kyfingar landsins þátt í mótinu og miðað við skor í meistaramótum klúbbana koma kylfingar vel undirbúnir til leiks. Íslandsmeistarar frá 2011, Axel Bóasson, GK og Ólafía Þórunn Kristinsdóttir, GR, eru meðal keppenda sem og fjórfaldur Íslandsmeistari í höggleik, Birgir Leifur Hafþórsson, GKG (1996, 2003, 2004, 2010).

Keppnisrétt á Íslandsmótinu hafa í raun allir kylfingar á Íslandi, þó reyndin sé sú að einungis forgjafarlægstu kylfingar landsins taki þátt. Í ár hafa 123 karlar og 27 konur skráð sig til leiks á Íslandsmótinu í höggleik.

Leiknar verða 72 holur á 4 dögum, en eftir 36 holu leik er leikmönnum fækkað í karlaflokki þannig að þeir sem hafa 72 lægstu skor halda áfram keppni. Ef keppendur eru jafnir í 72. sæti skulu þeir báðir/allir halda áfram.  Þó skulu leikmenn ætíð fá að halda áfram keppni séu þeir 10 höggum eða minna á eftir þeim keppanda, sem er í 1. sæti. Í kvennaflokki er fækkað með sama hætti í 18 eftir 36 holu leik.

Keppendur eru ræstir út frá kl. 7:30-15:30 fimmtudag og föstudag og frá kl. 7:30-13:30 laugardag og sunnudag.  Ræst verður út af 1. teig með 10 mínútna millibili. Á 1. og 2. keppnisdegi er keppendum raðað út á rástíma með tilviljunarkenndum úrdrætti, en að loknum niðurskurði ræður skor niðurröðun keppenda.

Verðlaun í Íslandsmótinu í höggleik eru þau sömu fyrir karla- og kvennaflokk þ.e. gjafabréf að andvirði 80.000,- fyrir fyrsta sæti, 40.000,- fyrir annað sæti og 20.000 fyrir þriðjasæti og 10.000 fyrir 4.-5. sæti.

Golf 1 hvetur alla til að koma á Hellu og fylgjast með stærsta móti landsins í golfi – Íslandsmótinu í höggleik!!!