Fowler hlakkar til að byrja tímabilið í Abu Dhabi – Viðtal

Rickie Fowler hlakkar til að hefja 2015 keppnistímabilið á HSBC Abu Dhabi Golf Championship, sem er mót á Evrópumótaröðinni og hefst í næstu viku.

Hann átti mjög gott ár 2014 og fór m.a. úr 40. sæti heimslistans upp í 10. sætið

Gulf News tók viðtal við Fowler í aðdraganda mótsins í Abu Dhabi. Hér má sjá viðtalið í lauslegri þýðingu:

Gulf News: Eru einhverjar sérstakar ástæður fyrir að þú ákvaðst að hefja tímabilið í Abu Dhabi?

Rickie Fowler:  Ég hafði heyrt margt jákvætt um Abu Dhabi HSBC Championship þannig að ég ákvað að skora á sjálfan mig og ferðast í eyðimörkina til þess að hefja keppnistímabilið hjá mér. Ég hef aldrei spilað í Miðausturlöndum áður sem leikmaður, en maður vill alltaf spila gegn þeim bestu í heiminum þannig að ef leikmenn á borð við Rory, Justin og Martin verða á National golfvellinum, þá vil ég líka vera þar. Keppendur í mótinu eru einhverjir þeir sterkustu í nokkru móti á Evrópumótaröðinni og listi fyrrum sigurvegara er mikilfenglegur, þannig að ég mun gera mitt besta til þess að krækja í fræga fálkabikarinn.

Martin Kaymer eftir einn sigurinn í Abu Dhabi með fálkabikarinn fræga, en hann hefir unnið hann 3 sinnum!

Gulf News: Hvernig er þessi áskorun þar sem þú ert að spila á ókunnuglegum slóðum?

Rickie Fowler: Ég virkilega hlakka til áskorunarinnar að spila á nýjum stað og hef spilað í nokkrum mótum Evrópumótaraðarinnar sl. ár, sem aðstoðar mig í að verða alhliða kylfingur.  Ég elska að nota mismunandi högg þannig að ég er spenntur að sjá hvernig ég spila á National golfvellinum og hvernig hann er öðruvísi frá þeim völlum sem ég hef reynslu af en ég hlakka líka til að upplifa lífið í Abu Dhabi.

Gulf News: Vindur er venjulega í aðalhlutverki í eyðimerkurvöllum; Líkar þér það?

Rickie Fowler: Ég hef aldri spilað í Mið-Austurlöndum þannig að ég er ekki algerlega viss um við hverju eigi að búast í eyðimörkinnni en ég elska að spila í vindi.  Sl. nokkur ár hef ég átt spennandi hringi á Opna breska og náð nokkrum góðum niðurstöðum þegar virkilega var hvasst þannig að ef þetta er eitthvað eins og þar, þá hlakka ég til áskorunarinnar.

Gulf News: Þú náðir góðum árangri árið 2014, hvernig metur þú frammistöðu þína? 

Rickie Fowler: Ég er virkilega stoltur af því sem ég náði 2014 og það var svo sannarlega besta ár mitt til dagsins í dag á túrnum.  Ég komst virkilega nálægt Rory á Opna breska og PGA Championship þannig að ég veit að ég er nálægt því að vinna eitthvað stórt og ég hlakka til að hefja keppnistímabilið á móti á Evróputúrnum þar sem samkeppnin er líklega einhver sú sterkasta á árinu.

Gulf News: Gætir þú varpað ljósi á undirbúning þinn?

Rickie Fowler: ég stefni að því að búa mig svipað undir mótið og á síðasta ári vegna þess að það virtist virka vel fyrir mig þannig að ég mun örugglega halda áfram að vinna í leik mínum með Butch [Harmon].  Á síðasta ári var ég ferskur í upphafi árs og jafnvel um mitt tímabilið var ég hress þannig að vonandi get ég endurtekið það.

Gulf News: Ertu með sérstök markmið fyrir 2015? Er eitthvað sérstakt mót eða titill sem þú vilt vinna?

Rickie Fowler: Meginmarkmið mitt er að halda áfram að vinna mikið í leik mínum og bæta alla þætti leik míns þar sem þörf er á að bæta frammistöðuna og koma mér í sigurfæri í mótum.  Það var gaman að vera í sigurfæri  í risamótunum 2014 og ég ætla að endurtaka æfingarnar sem við notuðum 2014 í undirbúningi mínum fyrir risamót þessa árs. Almennt markmið mitt er að sigra í fleiri mótum.  Til þess að ná því verð ég að halda áfram að verða betri og vera tilbúinn að vera upp á mitt best í hvert sinn sem ég spila. Mér myndi ekki þykja leiðinlegt að hefja keppnistímabilið með því að vinna fyrsta titil minn á Evróputúrnum hér í Abu Dhabi.