Forsetabikarinn 2019: Els tapar enn einu sinni f. Tiger – Það er sárt!

Þegar Tiger Woods sigraði eins og frægt er á Opna bandaríska 2000 þá var það Ernie Els sem lét í minni pokann fyrir honum.

Els var þá beðinn um komment, þar sem hann var í 2. sæti. Tiger átti 15 högg á hann og sló met Tom Morris á mesta mun milli 1. og 2. sætis í risamóti.

Els sagði við það tækifæri: „Ef Old Tom Morris og Tiger Woods myndu spila saman núna myndi Tiger vinna hann með 80 högga mun. Hey, þessi náungi (Tiger) er ótrúlegur. Mig skortir orð. Látið mig í friði.“

Els hefir sjaldnast unnið þegar Tiger Woods er annars vegar.

Tiger hefir sigrað Els í risamótum og í mótum á PGA Tour. Hann hefir sigrað hann í bráðabana og eftir hefðbundinn höggfjölda. Hann hefir sigrað hann í fjórmenningi og tvímenningi. Og nú í fyrirliða baráttu þeirra í Forsetabikarnum.

Sagan mun sýna að Els var nákvæmlega það sem Alþjóðaliðið þarfnaðist, leiðtogi sem öllum leikmönnum líkaði við.

En það var ekki nóg …. og það er sárt.

Els sagði fyrr í vikunni að jafnvel þó að lið Bandaríkjanna liti betur út á pappír þá væri spilað á grasi … og í 3 daga virtust orð Els ganga upp.  Lið Els var í forystu, átti m.a.s. 2 stig á lið Bandaríkjanna fyrir lokaviðureignirnar … en það dugði ekki.

Mestu reynsluboltarnir í liði Els, Louis Oosthuizen og Marc Leishman náðu ekki nema að halda jöfnu, þegar sigur var það sem Els þarfnaðist í þessum leikjum. Aðeins 2 leikmanna Els náðu að sigra í leikjum sínum; Sungjae Im og Cameron Smith. Þannig að þetta varð til þess að bikarinn fór til Bandaríkjanna 8. skiptið í röð.

Tapið er sárt og Els að vonum vonsvikinn og það sást glöggt þegar hann var beðin að meta frammistöðu Tiger bæði sem fyrirliða og leikmanns á Royal Melbourne. Svar Els: „Þið verðið að spyrja hann um það. Ég ætla ekki að svara þessu.“

„Ef okkar lið er á blaði borið saman við önnur íþróttalið, þá mynduð þið hafa hlegið ykkur máttlaus. En við létum þá hafa fyrir hlutunum og vorum nærri því að sigra og valda usla í einu besta golfliði allra tíma,“ sagði Els.

Þetta var auðvitað öðruvísi – allir fyrirliðar eru kappsfullir … en þetta var persónulegt. Fyrir Els var þetta tækifæri til þess að breyta gangi sögunnar aðeins … sigra Tiger einu sinni.  Fyrir Tiger var þetta aðeins að bæta við enn einni rósinni í hnappagatið.

„Það hafa verið virkilega forréttindi að fá að spila á sama tíma á hann (Tiger). Þangað sem golfið hefir náð á síðustu 25 árum er ótrúlegt og það (golfið) myndi ekki vera þar sem það er nú, ef það væri ekki fyrir Tiger Woods,“ viðurkenndi Els fyrr í vikunni áður en hann bætti við: „Eftir að hafa sagt þetta, þá langar okkur að sparka í afturendann á þeim hér í þessari viku, hér á heimavelli.“

Markmið Els í þessari viku sem sagt, (eins og svo oft áður) var sigur – en nú hefir Tiger haft betur sem fyrirliði, líkt og svo oft áður í ótal keppnum milli þessara tveggja miklu kempa.

Enn einu sinni situr Ernie Els eftir með sárt ennið.