Fjölgun á heimsóknum erlendra kylfinga á íslenska golfvelli

Á golfvef GSÍ golf.is mátti í gær lesa grein um mikla fjölgun erlendra kylfinga hingað til lands.

Það er í samræmi við umferðartölur á ensku og þýsku golffréttasíður Golf 1, en mikil umferð er um þær og greinilegt að erlendir kylfingar eru forvitnir hvað landið hefir upp á að bjóða golflega séð og nýta sér því upplýsingar Golf1.is óspart.

Á golf.is mátti annars lesa eftirfarandi:

„Fjölgun erlendra ferðamanna til Íslands hefur verið gríðarlega mikil á undanförnum árum. Á sama tíma hefur orðið töluverð fjölgun á heimsóknum ferðmanna sem leika golf hér á landi. Talið er að auking erlendra kylfinga hafi verið a.m.k. 15% á árinu 2013 og einstakir vellir hafa notið allt að 30% aukningar. 

Samtökin Golf Iceland tóku þátt í stærstu golfferðasýningu heims, IGMT, sem fram fór á Spáni í byrjun nóvember. Um 1200 manns frá um 60 löndum tók þátt í ár, seljendur golferða, kaupendur golfferða svo og fjölmiðlamenn, sem fjalla um golf.

Að sögn Magnúsar Oddssonar, starfsmanns samtakanna var komið á framfæri við kaupendur á fjölmörgum fundum upplýsingum um meðlimi samtakanna Golf Iceland, ásamt almennum upplýsingum um Ísland og golf á Íslandi. Þá var dreift efni til fjölmiðlafólks og þeim veittar upplýsingar á fundum.

Á sýningunni á Spáni voru haldnir fyrirlestar um ýmislegt sem tengist golfferðamennsku og ýmsar niðurstöður kannana birtar um ferðahegðun kylfinga, eyðslu og fleira eftir markaðssvæðum. Þar kom m.a. fram að um 10% aukning hafi verið í sölu á golferðalögum árinu 2012 samanborið við árið 2011. Þessi hluti ferðaþjónustunnar hefur vaxið mikið sérstaklega á síðustu 10 árum og nú er talið að í Evrópu velti golfferðamennska um 260 milljörðum kr. á hverju ári.“

Heimild: golf.is