Evróputúrinn: Branden Grace sigraði á Volvo Golf Champions eftir umspil við Els og Goosen

Nú rétt í þessu lauk Volvo Golf Champions, sem farið hefir fram á Fancourt links golfvellinum í Suður-Afríku. Ernie Els spilaði 4. hringinn á glæsilegu skori -6 undir pari, 67 höggum, var samtals á -12 undir pari, samtals 280 höggum (71 71 71 67)  og fékk 1 örn, 6 fugla og 2 skolla. Hann deildi 1. sæti eftir venjulegan leiktíma og 72 spilaðar holur með löndum sínum Retief Goosen (72 68 70 70) og Branden Grace (68 66 75 71) sem vann einmitt nú um síðustu helgi Joburg Open og er aldeilis að slá í gegn.

Branden Grace - sigurvegari Joburg Open og Volvo Golf Champions

Það þurfti því að koma til umspils milli þeirra þriggja og það fór fram á par-5 18. brautinni og því með sanni hægt að segja að úrslitin hafi ráðist á lokaholunni 73. holu á þessum par-73 velli.  Það var „Amazing Grace“ eða hinn undraverði Branden Grace sem sigraði gömlu frægðarkempurnar tvær með fugli.  Grace á eftir að fljúga upp heimslistann á morgun með sigrum sínum tveimur.

Áhangendur hins undraverða Branden Grace - „Amazing Grace."

Í 4. sæti varð Belginn Nicholas Colsaerts, sem missti fremur stutt pútt á 18. flöt og fékk skolla á þessa par-5 holu og varð þar með af því að deila 1. sætinu, með þremenningunum suður-afrísku. Þess mætti geta að hann fékk örn á þessa holu í gær, en svona er golfið, það er oft stutt milli hláturs og gráturs. Alls spilaði Nicholas á 281 höggi (64 76 69 72) og er því búinn að vera fremur óstöðugur.

Í 5. sæti var enn einn Suður-Afríkumaðurinn, sigurvegari Masters 2011 Charl Schwartzel á samtals – 10 undir pari, 282 höggum  (75 67 68 72) og í því 6. var spænski Ryder Cup fyrirliðinn, Jose Maria Olazabal á samtals -8 undir pari.

Til þess að sjá önnur úrslit á Volvo Golf Champions smellið HÉR: