Evróputúrinn & Sólskinstúrinn: Dawie Van Der Walt vinnur fyrsta sigur sinn á Evrópumótaröðinni – á Tshwane Open

Dawie Van Der Walt var að vinna fyrsta sigur sinn á Evrópumótaröðinni nú rétt í þessu á Tshwane Open mótinu, sem fram hefir farið í Copperleaf Golf & Country Estate.

Van Der Walt lék á samtals 21 undir pari, 267 höggum (68 65 67 67).

Í 2. sæti 2 höggum á eftir Van Der Walt varð Darren Fichardt, sem búinn var að leiða mestallt mótið. Hann spilaði samtals á 19 undir pari, 269 höggum (65 71 64 69).

Í þriðja sætinu varð Louis De Jager  á 18 undir pari og í 4. sæti varð síðan sá fyrsti sem ekki var frá Suður-Afríku, Peter Uihlein frá Bandaríkjunum á samtals 17 undir pari. Heimamenn frá Suður-Afríku: Van Der Walt, Fichardt og De Jager röðuðu sér nefnilega í 3 efstu sætin; enda þekkja þeir Ernie Els hannaða Copperleaf völlinn eflaust best allra.

Lítið var um þekkta kylfinga í mótinu; flestallir þátttakendur voru strákar sem komust í gegnum lokaúrtökumót Evrópumótaraðarinnar eða heimamenn af Sólskinstúrnum suður-afríska.  Eitt þekktasta nafnið; fyrirliði 2012 Ryder bikarsliðs Evrópu, José Maria Olazabal varð í síðasta sæti þeirra, sem komust í gegnum niðurskurð, þ.e deildi 76. sætinu á samtals 3 yfir pari.

Til þess að sjá úrslitin á Tshwane Open SMELLIÐ HÉR: