Evróputúrinn: Nr. 3 er komin – Stenson hættir við mót í Kína

Eitt af flaggskipsmótum Evrópumótaraðarinnar, þ.e. BMW Masters sem hefst á Lake Malaren n.k. fimmtudag í Kína, varð fyrir áfalli þegar tilkynnt var að sænski kylfingurinn Henrik Stenson hefði dregið sig úr mótinu. 

Þetta er annað áfallið á stuttum tíma en nr. 1 á heimslistanum, Rory McIlroy, var áður búinn að tilkynna að hann ætlaði ekki að taka þátt í mótinu til þess að geta einbeitt sér að málaferlunum við fyrrum umboðsskrifstofu sína á Írlandi.

Ástæða þess að Stenson tekur ekki þátt er að kona hans, Emma, fæddi dótturina Alice í Orlandó, Flórída s.l. sunnudag, og Stenson sem er nr. 3 á peningalista Evróputúrsins ákvað að vera hjá dóttur sinni nýfæddu í Bandaríkjunum.

Hann ætlar engu að síður að fara til Shanghai á World Golf Championships HSBC Champions  í Sheshan Golf Club, sem er vikuna þar á eftir en tekur sér viku frí í tilefni af fæðingu dóttur sinnar, en fyrir á hann hina 7 ára Lísu og hinn 4 ára Karl.

„Nr.3 er komin!!“ skrifaði Stenson posted á Facebook síðu sína ásamt mynd af honum þar sem hann heldur á Alice, nýfæddu dóttur sinni.