Evróputúrinn: Max Ting 4. yngstur til að spila í móti í sögu mótaraðarinnar

Það var fleira skrifað í sögubækur Evrópumótaraðarinnar á Hong Kong Open sl. helgi, en að sigurvegarinn Miguel Angel Jimenez væri elstur sigurvegara á mótaröðinni næstum 50 ára (stórafmæli hans er 5. janúar n.k.).

Í mótinu tók líka þátt 4. yngsti keppandi í sögu Evrópumótaraðarinnar, Max Ting,.

Hann var einn af fjölmörgum sem þátt tóku í sérstöku úrtökumóti í Hong Kong um eitt af 3 lausum sætum í mótið (styrktaraðilar og mótshaldarar fá ávallt nokkur sæti til ráðstöfunar og margir kylfingar sem sækja um í hvert sinn.)

Ting spilaði á 6 yfir pari, 146 höggum og komst í mótið – 13 ára og 288 daga ungur, sá 4. yngsti í sögu mótaraðarinnar til að taka þátt í móti mótaraðarinnar.

Yngri en Ting eru Ye Wocheng, sem var 12 ára og 242 daga þegar hann lék í China Open í ár (sá yngsti)  og Guan Tianlang var 13  ára og 173 daga þegar hann lék í China Open árið 2012.

Enn einn er yngri en Ting sá 3. yngsti en það er  Lo Shik-kai, sem var 13 ára og 280 daga þegar hann lék í Hong Kong Open, 2003.

Í 4. sæti yfir yngstu þátttakendur í móti Evrópumótaraðarinnar fram að þessu var Pedro Figueiredo, sem var 13 ára og 291 daga, þegar hann tók þátt í Portugal Caixa Geral de Despositos í Quinta de Marinha í Portúgal, árið 2005.  Ting bætti met Figueiredo um 3 daga.

Markmið Ting var að komast í gegnum niðurskurð en því miður voru skor mjög lág í Hong Kong Open og Ting náði ekki markmiði sínu að þessu sinni. Eftir að ljóst var að Ting næði ekki niðurskurði tók hann því vel og sagði hann: „Ég var svo stressaður, en þetta var samt gaman.“

Það sem er merkilegt er að í 4 efstu sætum yfir yngstu keppendur í móti Evrópumótaraðarinnar eru nú 4 kínverskir strákar og því ljóst að Kínverjar eiga eftir að mæta sterkir í alþjóðleg golfmót framtíðarinnar!