Evróputúrinn: Guðmundur Ágúst hefir lokið keppni á Indlandi

Guðmundur Ágúst Kristjánsson, atvinnumaður í GKG, hefir lokið keppni á Hero India Open.

Mótið fór fram á DLF G&CC, í Nýju-Delhi, Indlandi, dagana 23.-26. febrúar og lauk í dag.

Guðmundur Ágúst lék 4. og síðasta hring sinn á versta skori sínu í mótinu, 78 höggum, en á þeim hring fékk hann aðeins 1 fugl og síðan 5 skolla og 1 tvöfaldan skolla.

Samtals spilaði Guðmundur Ágúst á 6 yfir pari, 293 höggum (69 71 77 78).

Eftir frábæra byrjun í mótinu þar sem Guðmundur Ágúst var fyrst T-4 og síðan T-2 eru úrslitin, T-48 vonbrigði.

Hörð keppni er nú meðal Þjóðverjanna Paul Yannik, sem búinn er að vera í forystu allt mótið og Marcel Siem, um sigur í mótinu. Þess mætti geta að á 2. degi var Guðmundur Ágúst T-2 ásamt Marcel Siem og hefði verið gaman að sjá hann í stað Siem, berjast um sigurinn. Það kemur eflaust að því fyrr en síðar!!! Bara að koma sér nógu oft í efstu sætin til þess að fá tilfinningu fyrir þeim og taka síðan sigurinn einhverju sinni!!! Bara tíma- spursmál með Guðmund Ágúst.

Guðmundur Ágúst hefir nú í þrígang tekist að komast gegnum niðurskurð á Evrópumótaröðinni og vonandi að framhald verði á því í Kenya. Næsta mót á Evróputúrnum er Magical Kenya Open, sem fram fer 9.-12. mars n.k. Guðmundur Ágúst er meðal þátttakenda. Hann mun samt, fyrst um sinn, fara í örstutt frí hér á landi, milli móta.

Sjá má lokastöðuna á Hero India Open með því að SMELLA HÉR: