Erfið staða hjá stelpunum okkar á HM

„Þetta var erfiður dagur og við þurfum að horfa fram á veginn. Undirbúningurinn var góður og stelpurnar voru vel stemmdar. Aðstæður voru erfiðar að eiga við, keppnisvellirnir eru langir og krefjandi,“ sagði Úlfar Jónsson landsliðsþjálfari eftir 2. keppnisdag á heimsmeistaramóti áhugakylfinga sem fram fer í Mexíkó. Íslenska liðið lék illa og er í 47. sæti af alls 55 þjóðum.

Guðrún Brá Björgvinsdóttir úr Keili lék á 76 höggum eða +4 en þær Berglind Björnsdóttir úr GR og Signý Arnórsdóttir úr Keili léku á 89 og 90 höggum. Tvö bestu skorina telja á hverjum hring og er Ísland samtals á +33 eftir 36 holur.

Keppt er á Riveria Maya golfvallasvæðinu í Mexíkó. Mótið ber nafnið Espirito Santo Trophy og er þetta í 27. sinn sem mótið fer fram.

Guðrún Brá Björgvinsdóttir 79-76
Berglind Björnsdóttir 77-89
Signý Arnórsdóttir 79-90

„Þar að auki er hitinn og rakinn að gera okkur erfitt fyrir. Það er eins og að vera í fimm og hálfan tíma í gufubaði að vera úti á golfvelli og það reynir verulega á úthaldið og einbeitinguna. Ljósi punkturinn í þessu er spilamennskan hjá Guðrúnu Brá, sem setti saman fínan hring, þrátt fyrir að hafa byrjað á skramba á fyrstu holu (10. braut). Við byggjum á reynslunni og tökum það jákvæða með okkur í næsta hring. Stelpurnar gefast ekki upp og koma sterkar til leiks í dag á þriðja keppnisdegi,“ sagði Úlfar Jónsson landsliðsþjálfari.

Suður-Kórea er langefst á -13 samtals og þar á eftir koma Sviss (-3) og Írland á -1.

screen-shot-2016-09-16-at-6-54-47-am

Skorið á HM í liðakeppninni:

Skorið í einstaklingskeppninni:

Keppnin fer fram á tveimur völlum, Mayakoba El Camaleon og Iberostar Playa Paraiso og lýkur keppninni á laugardaginn.

Heimasíða mótsins:

Að þessu sinni eru 55 þjóðir sem taka þátt á HM áhugakylfinga og er það met. Fyrra metið var 53 þjóðir í Tyrklandi árið 2012. Tvær þjóðir senda lið til keppni í fyrsta sinn á HM en það eru Búlgaría og Marokkó.
Ástralía hefur titil að verja en Suður-Kórea fagnaði HM-titlinum 2010 og 2012.

Margir af keppendum sem tóku þátt á EM kvenna hér á landi í júlí á þessu ári eru á meðal keppenda. Stigahæstu kylfingarnir á áhugamannalistanum í kvennaflokki eru í Mexíkó og einnig eru margir kylfingar sem tóku þátt á ÓL í Ríó í Brasilíu nýverið.

Rose Tarpley frá Guam (54) er elsti keppandinn á HM og Elvira Rastvortseva (13) frá Úkraínu er sú yngsta. Dottie Ardina frá Filipseyjum var 12 ára þegar hún tók þátt árið 2006 á HM. Tiffany Chan frá Hong Kong er að taka þátt á sínu fimmta HM. Guðrún Brá Björgvinsdóttir er í hópi sex keppenda sem eru að taka þátt á sínu fjórða HM. Metið á þessu sviði á Elisabeth Nickhorn frá Brasilíu sem tók 13 sinnum þátt á HM.

Árangur Íslands á HM frá upphafi:

2014: 29. sæti af alls 50 þjóðum.
2012: 36. sæti af alls 53 þjóðum.
2010: 42. sæti af alls 52 þjóðum.
2008: 41. sæti af alls 48 þjóðum.
2006: 33. sæti af alls 42 þjóðum.
2004: Tóku ekki þátt.
2002: Tóku ekki þátt.
2000: 32. sæti af alls 32 þjóðum.
1998: Tóku ekki þátt.
1996: Tóku ekki þátt.
1994: 24. sæti af alls 29 þjóðum.
1992: Tóku ekki þátt.
1990: Tóku ekki þátt.

Texti: GSÍ