EPD: Stefán Már og Þórður Rafn komust í gegnum niðurskurð í Þýskalandi!

Nokkuð ljóst lá fyrir fyrr í dag að Þórður Rafn Gissurarson, GR, væri kominn í gegnum niðurskurð á Land Fleesensee Classic mótinu í Þýskalandi.

Þórður Rafn er samtals á parinu, spilaði í gær á glæsilegu 71 höggi og var stöðugur í dag á 73 höggum. Þórður Rafn deilir 23. sæti með 6 öðrum.

Meiri vafi var á því hvort Stefán Már Stefánsson, GR,  kæmist í gegn. Hann hélt öllum spenntum með því að vera undir niðurskurðarlínunni lengi vel og því mikil gleði þegar lokaniðurstaðan birtist um að niðurskurðurinn miðaðist við 3 yfir pari og Stefán Már þar með kominn í gegn.

Stefán spilaði nefnilega á 76  höggum í dag en var, eins og Þórður Rafn, á 71 höggi fyrri daginn; samtals 147 höggum og 3 yfir pari sem fyrr segir.  Hann er einn af 9 sem deila 43. sætinu og rétt sluppu í gegnum niðurskurð.

Golf 1 óskar þeim Þórði Rafni og Stefáni Má góðs gengis á morgun!

Til þess að sjá stöðuna eftir 2. dag Land Fleesensee Classic smellið HÉR: