Els ætlar að spila í færri mótum

Fyrst var það Steve Stricker, svo Phil Mickelson og nú ….. Ernie Els.

Ætli Stricker hafi vitað að hann hafi komið af stað æði meðal heldri stjörnukylfinga á PGA Tour? Manna sem hafa sannað sig í gegnum tíðina unnið mörg mót og þ.a.l. stórefnast og þurfa ekki að spila í mörgum mótum til að eiga fyrir salti í grautinn.

Stricker tilkynnti í upphafi árs að hann ætlaði ekki að spila á eins mörgum mótum og áður; leggja áherslu á gæði en ekki magn.  Sú strategía hans hefir reynst vel, en í þeim fáu mótum sem hann spilar í er hann undantekningarlaust meðal þeirra efstu.  Og nú ætla Mickelson og Els að fylgja í kjölfarið.

„Ég er bara að líta á valkosti mína,“ sagði Els. „Það er svo mikið um að vera núna. Það eru dásamleg mót, það er fullt af frábærum mótum í Bandaríkjunum og það virðist sem Evrópumótaröðin sé með ótrúleg mót í lok árs.“

„Ég verð bara að líta yfir farinn veg og hvert ég vil fara. Mér finnst ég svolítið „yfir-golfaður“ í augnablikinu, (þ.e. búinn að spila of mikið ) og það hefir áhrif á leikinn og maður verður bara að vera ferskur andlega.“

„Ég verð að líta á mikið af valkostum. Ég bý í Bandaríkjunum núna, börnin mín eru í skóla þar þannig að ég er að líta á þetta. Ég spila kannski ekki eins lítið og Steve Stricker spilaði í ár. En ég ætla að taka þátt í færri mótum.“