Eimskipsmótaröðin 2017 (6): Rástímar fyrir 1. keppnisdag á Hvaleyrarvelli

Íslandsmótið í golfi 2017 á Eimskipsmótaröðinni hefst á morgun, fimmtudaginn 20. júlí á Hvaleyrarvelli hjá Golfklúbbnum Keili í Hafnarfirði. Alls eru 141 keppendur skráðir til leiks, 112 karlar og 29 konur.

Flestir af bestu kylfingum Íslands mæta til leiks og má þar nefna atvinnukylfingana Valdísi Þóru Jónsdóttur úr Leyni, Axel Bóasson úr Keili og Harald Franklín Magnús, GR.

Meðalforgjöf karla á Íslandsmótinu 2017 er 2,02. Meðalforgjöf kvenna á Íslandsmótinu 2017 er 3,17.

Aðeins þeir sem eru með 5,5 eða lægri forgjöf geta tekið þátt í karlaflokki á Eimskipsmótaröðinni. Í kvennaflokki eru takmörkin við 8,5 í forgjöf.

Meðaaldur karla í mótinu er 27 ár. Elsti keppandinn er 64 ára, Björgvin Þorsteinsson, og Böðvar Bragi Pálsson GR er sá yngsti en hann er 14 ára, fæddur árið 2003.

Meðalaldur kvenna í mótinu er 22 ár. Elsti keppandinn er 52 ára, Þórdís Geirsdóttir og tveir keppendur í kvennaflokki eru 14 ára eða fæddar árið 2003. Kinga Korpak GS og Eva María Gestsdóttir úr GKG. Þess má geta að eldri systir Evu, Hulda Clara Gestsdóttir úr GKG er 15 ára og þær eru báðar á meðal keppenda.

Atvinnukylfingarnir Birgir Leifur Hafþórsson úr GKG og Ólafía Þórunn Kristinsdóttir úr GR hafa titla að verja á Íslandsmótinu í golfi. Þau geta því miður ekki mætt í titilvörnina þar sem þau eru bæði að keppa sem atvinnukylfingar á sama tíma í Evrópu og Bandaríkjunum. Atvinnukylfingurinn Þórður Rafn Gissurarson úr GR getur heldur ekki tekið þátt vegna verkefna á Pro-Golf mótaröðinni en Þórður varð Íslandsmeistari árið 2015.

Rástímar hafa verið birtir eru hægt að sjá þá með því að SMELLA HÉR: 

Texti: GSÍ