Eimskip, mikill styrktaraðili golfs á Íslandi. Mynd: Golf 1.
Ragnheiður Jónsdóttir | september. 2. 2012 | 11:00

Eimskipsmótaröðin (6): Gunnar Páll Þórisson fór holu í höggi!

Gunnar Páll Þórisson í Golfklúbbi Kópavogs og Garðabæjar (GKG) er einn þeirra sem tekur þátt í Síma mótinu, síðasta mótinu á Eimskipsmótaröðinni í ár.

6. braut í Grafarholtinu, þar sem Gunnar Páll fór holu í höggi í dag!

Fyrstu tvo daga mótsins spilaði Gunnar Páll á 85 höggum eða 14 yfir pari báða daga.  Sem stendur er Gunnar Páll í einu af neðstu sætunum í karlaflokki, 48. sætinu. Dagurinn í dag, þ.e. lokahringurinn er hins vegar sá langbesti hjá Gunnari Páli því hann fór nefnilega holu í höggi á 6. braut Grafarholtsins og er á 5 yfir pari þegar hann á 3 holur eftir óspilaðar.

Sjötta brautin er par-3, slegið er niður í móti, 188 metra af hvítum teigum. Í lýsingu GR á þessari löngu par-3 segir:  „Án efa ein af erfiðustu brautum vallarins og á landinu. 6. brautin er 188 metra löng og hefur skemmt marga hringi í gegnum tíðina. Hólar, glompur og grjót liggja hægra megin við flötina og brött hlíð er vinstra megin. Mjög erfitt er að hitta flötina þar sem hún hallar frá leikmönnum og er á tveimur pöllum. Nær ómögulegt er að ná pari ef leikmenn missa grínið með miklum mun og einnig ef bolti endar vinstra megin við flötina. Besti staðurinn til að missa flötina er fyrir framan. Miðið á fremsta hlutann á flötinni og reynið að ná pari með löngu tvípútti eða góðu vippi. Munið að skolli er aldrei slæmt skor á þessari braut.“

Golf 1 óskar Gunnari Páli innlega til hamingju með draumahöggið á þessari einni erfiðustu par-3 holu á landinu!