Eimskipsmótaröðin (4): 3 berjast um Íslandsmeistaratitilinn í 3 holu umspili

Það, hver hlýtur Íslandsmeistaratitil í höggleik 2013 í kvennaflokki ræðst af því hver stendur uppi sem sigurvegari í 3 stúlkna umspili á 10., 11. og 12. braut (1., 2. og 3. braut Ár-lykkjunnar) á Korpunni.

Þær sem keppa þannig um Íslandsmeistaratitilinn eru Guðrún Brá Björgvinsdóttir, GK, Ólafía Þórunn Kristinsdóttir, GR og Sunna Víðisdóttir, GR.

Í stuttu máli var mikil dramatík á 18. holu.

Valdís Þóra, sem ásamt Ólafíu Þórunni var í forystu á 17. holu, s.s. Golf 1 greindi frá, á 9 yfir pari, fékk slæman þrefaldan skolla á par-4 18. brautina (9. braut Ár-lykkju Korpunnar) heil 7 högg og skaut sig þar með úr mótinu; lauk keppni á 12 yfir pari, líkt og Anna Sólveig Snorradóttir, GK og deila þær tvær 4. sætinu.

Ólafía Þórunn Kristinsdóttir, GR, hins vegar, fékk „aðeins“ tvöfaldan skolla, heil 6 högg, á par-4 18. holuna (9. holu Ár-lykkjunnar) og lauk 72. holu, i á 11 yfir pari.

Sunna Víðisdóttir, GR, var aðeins 1 höggi á eftir forystukonunum Valdísi og Ólafíu Þórunni á 17. braut þ.e. á 10 yfir pari og fékk skolla, 5 högg á par-4, 18. brautina (9. holu Ár-lykkjunnar) og lauk einnig keppni á 11 yfir pari.

Guðrún Brá Björgvinsdóttir, GK sem átti erfitt um miðbik Árinnar sýndi gríðarlegan styrk á lokaholunum og fékk tvö pör á síðustu tvær holurnar og lauk líka við 72. holurnar,  á 11 yfir pari.

Guðrún Brá, Ólafía Þórunn og Sunna voru því allar á 11 yfir pari eftir hefðbundnar 72 holur og varð að koma til umspils milli þeirra, sem á sér stað í þessum skrifuðu orðum.

Nú er búið að spila 1. holu í umspilinu; 10. braut og allt jafnt – stúlkurnar farnar á 11. braut. Geysispennandi Íslandsmót í höggleik í kvennaflokki!!!