Signý Arnórsdóttir, GK. Mynd: Golf 1
Ragnheiður Jónsdóttir | júní. 26. 2012 | 21:30

Eimskipsmótaröðin (3): Signý Arnórsdóttir er Íslandsmeistari kvenna í holukeppni 2012 – Viðtal

Signý Arnórsdóttir, GK, er Íslandsmeistari kvenna í holukeppni 2012. Hún vann þær Hansínu Þorkelsdóttur, GKG og Heiðu Guðnadóttur, GKJ í undankeppninni, en tapaði naumlega fyrir Sunnu Víðisdóttur, GR en sá leikur fór á 20. holu.  Í 4 manna úrslitunum vann Signý, klúbbfélaga sinn, Tinnu Jóhannsdóttur, 3&2. Hér á eftir fer stutt viðtal við Signýju:

Golf 1: Hvernig var tilfinningin að hafa unnið Íslandsmeistaratitilinn í holukeppni?

Signý: Hún var mjög góð.  Hún er alltaf góð. Þetta var sætur sigur og ég er mjög ánægð.

Golf 1: Er þetta 1. Íslandsmeistaratitillinn?

Signý: Nei. ég varð fyrst Íslandsmeistari í holukeppni í Kiðjaberginu, 2009.

Golf 1: Í undankeppninni vannstu Hansínu Þorkelsdóttur, GKG og Heiðu Guðna, GKJ, en tapaðir fyrir Sunnu Víðisdóttur, GR. Hver af þessum leikjum var erfiðastur?

Signý: Í undankeppninni var leikurinn á móti Sunnu erfiðastur því við fórum á 20. holu.  Ég var búin að vera yfir allan tímann, en í lokin var allt jafnt og við urðum að fara í bráðabana.

Golf 1: Leikurinn við Tinnu fór 3&2. Hvað er eftirminnilegast frá þeim hring og síðan sigurhringnum, sem þú spilaðir við Önnu Sólveigu?

Signý: Ég vissi það að ég þyrfti að spila mitt besta golf á móti Tinnu.  Á þeim hring spilaði ég undir pari.  Eftirminnilegast frá hringnum við Önnu Sólveigu var 17. holan, en það var mjög sérstakt að bæði í leiknum við Tinnu og svo við Önnu lentu boltar þeirra fyrir aftan sama steininn í 2. höggi þeirra (sem þær urðu síðan að taka víti frá).

Golf 1: Hver eru markmiðin fyrir sumarið?

Signý: Ég kýs að halda þeim fyrir mig.

Golf 1: Ætlar þú að taka þátt í Íslandsmótinu í holukeppni á Hellu?

Signý: Já, að sjálfsögðu.

Golf 1: Að lokum: Hvað gerir þú til þess að verða svona góð í golfi?

Signý: Ég veit það ekki. Ég er ekki sú duglegasta að æfa. Mér finnst ekki gaman að standa klukkustundum saman á æfingasvæðinu og slá bolta. Það sem er gaman er að spila golf með bróður mínum og kæresta.  Annars er ég bara með þetta í blóðinu og er þar að auki tapsár og mikil keppnismanneskja.