Day tilbúinn að mæta Spieth á TOC til að kljást um 1. sæti heimslistans

Það verður ekki auðvelt fyrir Jason Day að snúa aftur í keppnisgolfið á Hawaii í þessari viku en hann er ekki aðeins búinn að vera í jólafríi heldur einnig í 3 mánaða löngu fríi frá keppnisgolfi allt frá því hann sigraði á Tour Championship í september s.l.

Hann hefir verið í fríi vegna fæðingar dóttur sinnar Lucy en hann vildi vera hjá fjölskyldunni fram að fæðingu (í nóvember) og síðan vera til staðar fyrstu dagana í lífi dóttur sinnar.

En svo er ekkert nema harkan sex þegar hann mætir Jordan Spieth en þar mun Day gera atlögu að 1. sæti heimslistans, en Day er sem stendur í 2. sætinu og Rory McIlroy (sem ekki tekur þátt í Tournament of Champions (skammst.: TOC) er í 3. sætinu.

Einungis 32 menn keppa í TOC en það eru allt sigurvegarar af PGA Tour.

Meðal sterkra keppenda í mótinu verða einnig kylfingar á borð við Bubba Watson, Ricky Fowler, Dustin Johnson , sá sem á titil að verja Patrick Reed og sigurvegari Opna breska síðasta árs, Zach Johnson.

Golfheimurinn bíður spenntur til að sjá hvernig hinum 28 ára Day og hinum 22 ára Spieth muni farast í TOC, sem hefst n.k. fimmtudag.