Ragnheiður Jónsdóttir | júní. 22. 2022 | 09:00

Brooks Koepka dregur sig úr Travelers

Margir eiga erfitt með að trúa að Brooks Koepka sé að yfirgefa PGA Tour og flytja sig yfir til nýju sádí-arabísku ofurgolfdeildarinnar, LIV Golf Series.

Það sem bent hefir verið á í því sambandi er að Brooks sé skráður til leiks í einu móta PGA Tour nú í vikunni og engar yfirlýsingar hafi borist um flutninginn, hvorki frá honum né LIV golf Series.

Nú hefir það gerst að Brooks Koepka hefir dregið sig úr Travelers Championship, mótinu á PGA Tour, sem hann var skráður í og nú er bara beðið eftir yfirlýsingu frá honum um að hann skipti yfir til LIV, sbr. Golf Digest.

PGA Tour tilkynnti að Mark Hubbard muni taka sæti Brooks á Travelers.

LIV Golf Series er sagt bjóða bestu leikmönnum PGA Tour, meira en $100 milljónir, til þess að koma yfir til LIV.

Brooks Koepka er fjórfaldur risamótsmeistari og er sem stendur nr. 19 á heimslistanum. Þegar til þess kemur að hann tilkynnir um skiptin yfir til LIV Golf Series mun hann vera næst hæst rankaði kylfingur á heimslistanum á LIV (á eftir Dustin Johnson, sem var í 16. sæti heimslistans, þegar hann gekk í raðir LIV).

Þó LIV hafi ekki opinberlega tilkynnt að Koepka muni verða nýjasti kylfingur þeirra, telur Golf Digest að það muni fylgja fljótlega nú þegar fyrsta mót LIV í Bandaríkjunum er handan við hornið, en það hefst í  næstu viku á Pumpkin Ridge golfvellinum fyrir utan Portland, í Oregon og stendur 1.-3. júlí 2022.