Ragnheiður Jónsdóttir | október. 29. 2021 | 20:00

Björgvin Þorsteinsson látinn

Björg­vin Þor­steins­son, lögmaður og sexfaldur Íslands­meist­ari í golfi, lést á líkn­ar­deild Land­spít­ala 14. október sl. 68 ára. Hann hafði síðustu ár glímt við krabba­mein.

Björg­vin fædd­ist á Ak­ur­eyri 27. apríl 1953, son­ur hjón­anna Þor­steins Magnús­son­ar vél­stjóra og Önnu Rósamundu Jó­hanns­dótt­ur hús­freyju. Hann lauk stúd­ents­prófi frá Mennta­skól­an­um á Ak­ur­eyri 1973 og lög­fræðiprófi frá Há­skóla Íslands 1980. Hann varð héraðsdóms­lögmaður 1982 og hæsta­rétt­ar­lögmaður 1986.

Björg­vin starfaði sem full­trúi sýslu­manns­ins í Aust­ur-Skafta­fells­sýslu 1980-1981 og full­trúi á lög­manns­stofu Gylfa og Svölu Thorodd­sen 1981-1983. Hann starfaði sjálf­stætt frá 1983, síðast hjá Draupni lög­mannsþjón­ustu.

Björg­vin sat í stjórn Golf­klúbbs Ak­ur­eyr­ar 1967-1969 og í stjórn Bridges­am­bands Íslands 1987- 1992, í stjórn Lög­manna­fé­lags Íslands 1985-1987 og í stjórn Golf­sam­bands Íslands 1998-2002. Þá átti hann sæti í áfrýj­un­ar­dóm­stól ÍSÍ und­an­farna tvo ára­tugi.

Björgvin varð eins og segir 6 sinnum Íslandsmeistari 1971-1977, þar af fimm ár í röð, 1973-1977 og er það afrek sem enginn hefur enn leikið eftir í karlaflokki.

Björgvin Þorsteinsson, ásamt forseta GSÍ (t.h.) á lögmannamóti í golfi 2015. Mynd: Golf 1

Hann spilaði í 56 Íslandsmótum, síðast sl. sumar á Jaðarsvelli á Akureyri og var þá elsti keppandinn. Nú í ár varð hann Íslandsmeistari í flokki 65+ í Vestmannaeyjum. Jafnframt varð hann klúbbmeistari hjá GA 9 sinnum og GR 2 sinnum og GHH einu sinni. Björgvin fékk 11 ása á ferlinum, fleiri en nokkur annar hérlendis. Þá tók hann margoft þátt í árlegri viðureign lögmanna við lækna og var það honum að þakka að lögmenn hömpuðu titlinum í þessari viðureign margsinnis. Ennfremur tók hann oft þátt í golfmótum lögmanna (og er myndin hér að ofan frá einu slíku árið 2015 og tekur Björgvin þar við verðlaunum í karlaflokki, eins og svo oft, fyrr og síðar.   Björg­vin var sæmd­ur heiður­skrossi ÍSÍ á ársþingi Íþrótta- og ólymp­íu­sam­bands Íslands nú í októ­ber.

Fyrri eig­in­kona Björg­vins var Her­dís Snæ­björns­dótt­ir, flug­freyja og full­trúi, þau skildu. Dótt­ir þeirra er Steina Rósa. Síðari eig­in­kona Björg­vins er Jóna Dóra Krist­ins­dótt­ir, hjúkr­un­ar­fræðing­ur og ljós­móðir. Stjúp­son­ur Björg­vins og son­ur Jónu Dóru er Krist­inn Geir.

Golf 1 vottar fjölskyldu, vinum og vandamönnum Björgvins innilega samúð.