Birgir Leifur spilar á 2. úrtökumóti Evrópumótaraðarinnar á Costa Ballena

Birgir Leifur Hafsteinsson, GKG, spilar á 2. stigi úrtökumóts fyrir Evrópumótaröðina, dagana 2. – 5. desember. Spilað er samtímis á 4 völlum á Spáni:

1. Costa Ballena, Cadiz.

2. Las Colinas, Alicante.

3. El Valle, Murcia.

4. La Manga, Cartagena.

Birgir Leifur valdi að spila á Costa Ballena keppnisvellinum, sem mörgum Íslendingnum er að  góðu kunnur, m.a. vegna Golfskóla Magnúsar og Harðar, sem starfræktur hefir verið þar um árabil.

Golf 1 mun vera með kynningu á öllum golfvöllum 2. stigs úrtökumótsins fyrir Evrópumótaröðina og verður að sjálfsögðu byrjað hér á eftir á vellinum sem Birgir Leifur valdi sér: Costa Ballena.

Birgir Leifur slapp við að spila á 1. stigi úrtökumótsins, vegna þess að hann var með keppnisrétt á Áskorendamótaröðinni. Nú í ár spreyttu 2 Íslendingar sig á 1. stiginu s.s. öllum er í fersku minni: Þórður Rafn Gissurarson, GR og Ólafur Már Sigurðsson, GR í Fleesensee 20.-23. september s.l. Keppendur á 1. stigi voru u.þ.b. 710 í 9 mótum og þar af komust u.þ.b. 25%  eða 180 á 2. stigið.

Á 2. stigi Q-school er búist við að þátttakendur verði u.þ.b. 310 (þ.e. við þá 180 sem komust upp af 1. stiginu bætast m.a. þeir við sem hafa keppnisrétt á Áskorendamótaröðini). Af 2. stiginu fara síðan um 25%, eða u.þ.b. 80 á 3. og lokaúrtökumót Q-school Evrópumótaraðinnar, sem er 6 hringja erfitt lokamót, haldið 10.-15 desember á PGA Catalunya golfvellinum í Girona á Spáni.