Birgir Leifur hefur leik á 2. stigi úrtökumóts fyrir Evrópumótaröðina

Íslandsmeistarinn okkar í höggleik, Birgir Leifur Hafþórsson, GKG, er svo sannarlega búinn að standa sig vel að undanförnu.

Hann hefir komist á 2. stig bæði á úrtökumótum fyrir Evrópumótaröðinia og Web.com mótaröðina í Bandaríkjunum.

Í dag kl. 10:15 að staðartíma í Tarragona á Spáni (kl. 9:15 að okkar tíma hér heima á Íslandi) hefur Birgir Leifur leik á golfvelli Lumine Beach & GC í Tarragona, en völlurinn er hannaður af ástralska kylfingnum Greg Norman.

Mót á 2. stigi úrtökumótsins fyrir Evrópumótaröðina fara fram á 4 stöðum á Spáni: í Tarragona þar sem Birgir Leifur spilar, á Las Colinas golfvellinum í Allicante; á El Saler í Valencia og loks á Valle Romanot vellinum í Estepona, Malaga.

Mótin fara öll fram dagana 2.-5. nóvember;  þátttakendur eru u.þ.b. 80 í hverju þeirra – leiknir eru 4 hringir með engum niðurskurði og u.þ.b. 25% þ.e. 20 efstu í hverju móti halda áfram á lokastig úrtökumótsins, sem fram fer  á PGA Catalunya golfvellinum í Girona, Spáni, dagana 10.-15. desember n.k.

Margir mjög sterkir kylfingar taka þátt í úrtökumóti Birgis Leifs þ.á.m. er Haydn Porteous frá Suður-Afríku, ensku kylfingarnir Sam Hutsby og Zane Scotland, sænsku kylfingarnir Patrik Sjöland og Jarmo Sandelin, Skotinn Elliot Saltman,  spænski kylfingurinn og „heimamaðurinn“ Borje Etchart og Tiago Cruz frá Portúgal.  Allt eru þetta strákar sem hafa spilað á Evrópumótaröðinni og afar líklegt að einhverjir framangreindu komist á lokaúrtökumótið.

Til þess að sjá skortöflu í mótinu SMELLIÐ HÉR: