Áskorendamótaröð Íslandsbanka (2): Úrslit

Rjúkandi vöffluilmur tók á móti kylfingum þegar þeir luku keppni á Áskorendamótaröð Íslandsbanka sem fram fór á Þverárvelli á Hellishólum, í dag 1. júní 2013.  Húsfreyjan á Hellishólum stóð við járnið og bakaði á meðan bóndinn sá um innsláttinn á skorinu.

Já það var vel tekið á móti yngstu kylfingunum á Hellishólum og þrátt fyrir að veðurguðirnir hafi kannski ekki verið alveg uppá sitt besta þá var skorið ágætt og snilldartilþrif sáust á vellinum.

Lægsta skor dagsins átti Daníel Ísak Einarsson GK, en hann lék völlinn á 82 höggum en hann var í flokki 14 ára  og yngri stráka. Í flokki 15-16 ára sigraði Sverrir Kristinsson GK en hann lék á 83 höggum, en Elías Fannar Arnarsson GK var á sama skori, en bráðabani réð röðinni.

Hér má sjá sigurvegara í flokki 15-16 ára drengja f.v. Stefán Ingvarsson, GK, sem varð í 3. sæti í flokki 15-16 ára drengja og síðan  sigurvegarann í flokki 15-16 ára drengja Sverri Kristinsson, GK, (f.m) ásamt framkvæmdastjóra GSÍ, Herði Þorsteinssyni. Mynd: GSÍ

Á myndinni hér að neðan eru Stefán Ingvarsson GK sem var í 3. sæti, Sverrir Kristinsson GK sem sigraði í þessum flokki ásamt framkvæmdastjóra GSÍ, Herði Þorsteinssyni.

Í flokki 17-18 ára drengja sigraði Jón Hákon Richter GO.

Í stúlknaflokki 14 ára og yngri sigraði Íris Lorange Káradóttir GK á 103 höggum og í flokki stúlkna 15-16 ára sigraði Ólöf Agnes Arnardóttir GO á 95 höggum.

Helstu úrslit eru hér fyrir neðan:

Heimild: GSÍ