Arnór Ingi lék best á 27 holu æfingamóti fyrir undankeppni EM karlalandsliða

Undankeppni fyrir Evrópumót karlalandsliða fer fram á Hvaleyrarvelli 12.-14. júlí næstkomandi. Úlfar Jónsson, landsliðsþjálfari, boðaði tíu kylfinga til æfinga á Hvaleyrarvelli í gær þar sem leiknar voru 27 holur. Þar sem um mánuður er í mótið þótti við hæfi að kalla saman hóp kylfinga sem koma til greina í íslenska landsliðshópinn og spreyta sig á Hvaleyrarvelli.

Slegið var upp móti og veitt verðlaun fyrir besta skor á 27 holum. Arnór Ingi Finnbjörnsson úr GR lék best allra en hann lék holurnar 27 á samtals tveimur höggum undir pari. Haraldur Franklín Magnús úr GR og Rúnar Arnórsson úr Keili léku báðir á samtals pari.

Frá æfingunni á Hvaleyrinni í gær. Ragnar Ólafsson (t.h.) á mynd. Mynd: GSÍ

Þeir kylfingar sem voru í æfingahópnum á Hvaleyrarvelli í gær voru eftirfarandi:
Arnór Ingi Finnbjörnsson, GR
Haraldur Franklín Magnús, GR
Rúnar Arnórsson, GK
Alfreð Brynjar Kristinsson, GKG
Andri Þór Björnsson, GR
Andri Már Óskarsson, GHR
Arnar Snær Hákonarson, GR
Axel Bóasson, GK
Guðjón Henning Hilmarsson, GKG
Guðmundur Ágúst Kristjánsson, GR

Ólafur Björn Loftsson úr Nesklúbbnum og Kristján Þór Einarsson úr Keili fengu einnig boð í æfingahópinn en voru fjarri góðu gamni vegna verkefna erlendis. Þeir leika á Opna breska áhugamannamótinu sem fram fer í næstu viku.

Hvaleyrin 12. júní 2012. Frá æfingamóti fyrir undankeppni EM karlalandsliða. Mynd: GSÍ

Verðlaun voru veitt fyrir besta skor:
1. Arnór Ingi 71-34; -2
2.-3. Haraldur Franklín 69-38; par
2.-3. Rúnar Arnórsson 73-34; par

Verðlaun veitt fyrir tölfræði:
Flestar hittar brautir: Arnór Ingi 61%
Flatir í tilætluðum höggafjölda: Arnór Ingi og Rúnar: 71%
Fæst pútt á flötum hittum í tilætluðum höggafjölda: Haraldur Franklín 1,65
Scrambling (bjarga pari eftir missta flöt): Arnór Ingi: 93%

Auk Íslands keppa Belgía, England, Holland, Portúgal, Rússland, Rúmenía, Slóvakía og Serbía í mótinu. Þrjár efstu þjóðirnar komast áfram í aðalkeppnina.

Heimild: GSÍ (myndir og texti)