Andy Zhang 14 ára strákur tekur þátt í US Open í stað Paul Casey

Vikan var varla byrjuð og þegar eru þúsundir frétta og sagna sem hægt er að skrifa um  US Open sem hefst nú á fimmtudaginn.

Þar er t.a.m. spennandi „endurkoma“ Tiger eftir glæstan sigur hans á Memorial; nýlegir sigrar Lee Westwood og Dustin Johnson.  Tekst Lee nú loks að sigra á 1. risamótinu sínu, fyrst púttin eru öll að lagast hjá honum?

Hnignun og smáris Rory McIlroy  í Memphis; Casey Martin sem spilar í Olympic Club 40 ára o.fl. o.fl.

En þetta er bara rétt byrjunin.  Það er  týpískt fyrir Opna bandaríska (ens.: US Open) að fram komi bragðmiklar fréttir rétt fyrir mótsbyrjun.  Þessi er bara nokkuð sæt: 14 ára strákur tekur nú þátt í US Open.

Andy Zhang, sem er kínverskur í aðra röndina og er ekki orðinn nógu gamall til að keyra bíl, tekur þátt í einu af 4 risamótum í golfinu.  Hann er sá yngsti í sögu US Open til að tía upp í mótinu eftir seinni heimstyrjöldina.

Zhang rétt missti af tryggu sæti í lokaúrtökumóti fyrir US Open eftir umspil, þar sem hann beið lægri hlut, fyrir skemmstu.

Andy Zhang komst inn í mótið eftir að Englendingurinn Paul Casey dró sig úr mótinu vegna ótilgreindra veikinda, sem þó má líklega rekja til snjóbrettaslyss Casey um jólin.