Ragnheiður Jónsdóttir | mars. 27. 2013 | 11:30

Ákvarðanir R&A um reglu 6-3 a – (3. grein af 5)

Á fimmtudaginn í s.l. viku,  21. mars 2013 fór fram fræðslu- og umræðufundur dómaranefndar GSÍ um hvað gera megi til að bæta leikhraða á golfvöllum.

Þórður Ingason, alþjóðadómari ræddi á fundinum um „5 mínútna regluna“ svokölluðu, þ.e. reglu 6-3a í golfreglum R&A. Reglan gengur út á að ef kylfingur mætir allt að 5 mínútum of seint á teig eigi hann ávallt rétt á að hefja leik gegn viðurlögum upp á 2 högg í víti. Mæti hann seinna sætir hann frávísun, þ.e. mæti kylfingur meira en 5 mínútum of seint hlýtur hann frávísunarvíti.

Á reglu 6-3 a er undantekning. Þ.e. mótsnefnd (hér nefnd Nefndin) getur ákveðið að ekki skuli koma til þessara 2 högga í víti mæti kylfingur allt að 5 mínútum of seint, eigi sérstök undantekningartilvik við um kylfing, sem hafi orðið þess valdandi að hann mætti of seint á teig. Þessi undantekningtilvik eru túlkuð mjög þröngt.

Meðal efnis í ræðu Þórðar voru 5 nýlegar ákvarðanir R&A um túlkun á 5 mínútna reglunni. Golf 1 hefir þegar fjallað um tvær af þessum 5 ákvörðunum R&A og hér fer ákvörðun nr. 3

Úrlausnarefni ákvarðananna eru settar fram í spurnarformi og síðan ákvörðunin/reglan gefin í svari við spurningunni.

Spurning:  Rástími kylfings er kl. 9:00. Hann mætir ekki á teig fyrr en kl. 09:00:22 þ.e. 22 sekúndum of seint. Kylfingurinn heldur því fram að klukkan sé enn 9 og hann eigi því ekki að fá 2 högg í víti. Hvernig dæmist?
Svar: Þegar rástími kylfings er tiltekinn kl. 09:00 þá er hann kl. 09:00 þannig að skv. reglu 6-3 a hlýtur hann víti ef hann er ekki á staðnum á þeim tíma og tilbúinn að hefja leik. Því hlýtur kylfingurinn 2 högg í víti í höggleik eða holumissi í holukeppni nema Nefndin ákveði að sérstakar kringumstæður hafi orðið til þess að hann gat ekki hafið leik á réttum tíma.  Hér hlýtur kylfingur því víti jafnvel þó hann mæti aðeins nokkrum sekúndum og seint á teig!