Afmæliskylfingur dagsins: Martin Kaymer —— 28. desember 2014

Það er nr. 12 á heimslistanum, þýski PGA risamótstitilshafinn Martin Kaymer, sem er afmæliskylfingur dagsins. Kaymer fæddist 28. desember 1984 í Düsseldorf í Þýskalandi og á því 30 ára stórafmæli í dag!

Martin Kaymer er svo sannarlega búinn að eiga glæsiár, árið 2014 og margt sem gerst hefir í lífi hans á árinu, sem er að líða.  Eftirminnilegur er stórglæsilegur sigur hans á Opna bandaríska risamótinu, þar sem hann átti 8 högg á næsta keppanda.  Eins sigraði hann á Players mótinu, sem oft er nefnt 5. risamótið. Í árslok á síðasta ári var hann í 39. sæti heimslistans og er því búinn að fara upp heimslistann um 27 sæti á þessu ári!

Meginpart ársins var Martin Kaymer á lausu – lék m.a. í Pro-Am mótum með ýmsum fegurðardísum í von um að finna þá einu réttu og nægir þar að nefna leik hans við rússneska kylfinginn og fegurðardísina Maríu Verchenovu

Verchenova og Kaymer skemmtu sér vel á Pro-Am móti, þar sem bæði fengu að spila saman þótt bæði séu atvinnumenn – svo vel fór á með þeim

Eftir sigurinn á Opna bandaríska voru ýmsir að spá í hvort Kaymer væri að draga sig saman við löndu sína, fegurðardísina og stórkylfinginn Söndru Gal, en frá upphafi gáfu bæði frá sér að þau væru bara góðir vinir.  Sandra hljóp m.a. á völlinn eftir sigur Kaymer á stórmótinu og skvetti úr vatnsflösku á hann eins og gert er  við sigurvegara á kvennamótum.

Það var svo ekki fyrr en í lok nóvember á þessu ári að Kaymer lét frá sér fara fréttatilkynningu þar sem sagði að hann væri byrjaður með frænku liðsfélaga síns í Ryder bikar keppninni Stephen Gallacher, þ.e. Kristy.   Sjá frétt Golf 1 með því að SMELLA HÉR: 

Kaymer heldur heimili bæði í Mettmann í Þýskalandi og í Scottsdale, Arizona og æfir í eyðimörkinni þar – en við þannig aðstæður virðist hann kunna vel við sig  s.s. 3 sigrar hans á Evrópumótaröðinni í Abu Dhabi bera vitni um.  Kaymer gerðist atvinnumaður 2005 og hefir á þeim tíma sigrað 22 sinnum, þar af 11 sinnum á Evrópumótaröðinni. Fræknasti sigrar hans til þessa  kom eflaust í ár, 2014,  á Opna bandaríska og eins þegar hann sigraði á PGA Championship risamótinu, árið 2010.  Frá þeim tíma hefir Kaymer átt fastasæti í sigurliðum Evrópu í Rydernum þ.e. árið 2010 og síðan var hann einnig í undraliðinu evrópska í Rydernum í Medinah, átti sigurpútt liðsins þar.

Afmæliskylfingurinn okkar vann það einstaka afrek eitt sinn að spila á 59 höggum á Habsberg Classic, þ.e. 22. júní 2006 meðan hann spilaði enn á EDP túrnum. Hér má sjá skorkort Martin Kaymer á frábæra 59 högga hring hans, upp á -13 undir pari, en það eru ekki margir kylfingar, sem hafa „breakað“ 60 úti á golfvelli og hvað þá í móti eins og Kaymer gerði:

Loks má hér sjá myndskeið með fallegri golfsveiflu afmæliskylfingsins Kaymers:  MARTIN KAYMER Í SVEIFLU

Aðrir frægir kylfingar sem eiga afmæli í dag eru m.a.: Peggy Wilson, 28. desember 1934 (80 ára stórafmæli);  Hubert Myatt Green, 28. desember 1946 (68 ára) ….. og ……

Sigríður Snorradóttir (54 ára)

Golf 1 óskar afmæliskylfingnum og öðrum kylfingum sem afmæli eiga í dag innilega til hamingju með afmælið!

Ef þið viljið koma að afmælisgrein eða láta afmæliskylfings getið í upptalningu kylfinga, sem eiga afmæli hafið samband við golf1@golf1.is