Ragnheiður Jónsdóttir | desember. 28. 2011 | 12:00

Afmæliskylfingur dagsins: Martin Kaymer – 28. desember 2011

Það er nr. 4 á heimslistanum, þýski PGA risamótstitilshafinn Martin Kaymer, sem er afmæliskylfingur dagsins. Kaymer fæddist 28. desember 1984 í Düsseldorf í Þýskalandi og er því 27 ára í dag. Hann heldur heimili bæði í Mettmann í Þýskalandi og í Scottsdale, Arizona og æfir í eyðimörkinni þar – en við þannig aðstæður virðist hann kunna vel við sig  s.s. 3 sigrar hans á Evrópumótaröðinni í Abu Dhabi bera vitni um.  Kaymer gerðist atvinnumaður 2005 og hefir á þeim tíma sigrað 18 sinnum, þar af 10 sinnum á Evrópumótaröðinni. Fræknasti sigur hans til þessa  er þó á PGA Championship risamótinu, árið 2010 og eins var hann í sigursælu Ryder Cup liði Evrópu sama ár.

Afmæliskylfingurinn okkar komst m.a. í fréttirnar í desember fyrir ári síðan, þegar hann ákvað að draga sig úr Chevron móti Tiger Woods og vera þess í stað kaddý fyrir kærestu sína Alison Micheletti, sem spilaði golf með Furman háskóla (sama háskóla og Ingunn Gunnarsdóttir, GKG, stundar nám í og spilar með golfliði skólans). Micheletti komst ekki í gegnum niðurskurðinn í Q-school LET, en sýndi mikla framför þann dag sem Kaymer var á pokanum hjá henni, þ.e. spilaði fyrri hringinn á 89 höggum en seinni með Martin á pokanum á 76. Hér má sjá mynd af þeim skötuhjúum:

Martin Kaymer kylfuberi fyrir kærestuna Allison Micheletti í Q-school LPGA, í desember 2010.

Afmæliskylfingurinn okkar vann það einstaka afrek eitt sinn að spila á 59 höggum á Habsberg Classic, þ.e. 22. júní 2006 meðan hann spilaði enn á EDP túrnum. Hér má sjá skorkort Martin Kaymer á frábæra 59 högga hring hans, upp á -13 undir pari, en það eru ekki margir kylfingar, sem hafa „breakað“ 60 úti á golfvelli og hvað þá í móti eins og Kaymer gerði:

Hola 1 2 3 4 5 6 7 8 9 Út 10 11 12 13 14 15 16 17 18 Inn Samt.
Par 4 3 4 5 4 4 4 3 5 36 4 5 3 4 4 4 3 5 4 36 72
Skor 4 4 3 4 3 3 4 2 4 31 3 3 2 4 3 3 2 5 3 28 59

 

Loks má hér sjá myndskeið með fallegri golfsveiflu afmæliskylfingsins Kaymers:  MARTIN KAYMER Í SVEIFLU

Aðrir frægir kylfingar sem eiga afmæli í dag eru m.a.: Peggy Wilson, 28. desember 1934 (77 ára);  Hubert Myatt Green, 28. desember 1946 (65 ára); Sigríður Snorradóttir, 28. desember 1960.

Ef þið viljið koma að afmælisgrein eða láta afmæliskylfings getið í upptalningu kylfinga, sem eiga afmæli hafið samband við golf1@golf1.is