Ragnheiður Jónsdóttir | júlí. 12. 2013 | 12:00

Afmæliskylfingur dagsins: Inbee Park ——— 12. júlí 2013

Afmæliskylfingur dagsins er Inbee Park  (kóreanska: 박인비, Hanja:  朴仁妃) Hún er fædd 12. júlí 1988 og á því 25 ára afmæli í dag. Hún er þessa dagana við keppni á Manulife Financial LPGA Classic í Ontario, Kanada og deilir 3. sæti eftir 1. dag.

Inbee er búin að sigra á öllum risamótum kvennagolfsins það sem af er ársins (þ.e. 3 risamót af 5) og á möguleika á „Grand Slam“ í kvennagolfinu takist henni að sigra á Opna breska kvennamótinu sem fram fer 1.-4. ágúst n.k. í sjálfri vöggu golfsins St. Andrews, þ.e. hún verður þá fyrsti kylfingur sögunnar til að hafa unnið 4 risamót á sama árinu!  Vel við hæfi að vinna það afrek á St. Andrews.

Stundum er snúið úr úr nafni hennar á enskri tungu og sagt að Inbee sé „Inbee-lievable“  þ.e. ótrúleg og það má alveg taka undir það!

Þrátt fyrir ungan aldur hefir hún sigrað á 14 mótum á atvinnumannsferli sínum en Inbee gerðist atvinnumaður í golfi fyrir 7 árum, þ.e. 2006.  Þar af hefir hún sigrað í 9 mótum á LPGA og í 4 mótum á japanska LPGA, þar af í 4 risamótum kvennagolfsins.  Til samanburðar má geta þess að Annika Sörenstam sigraði í 10 risamótum kvennagolfsins og hefir Inbee 15 ár til að slá við því risamótameti Anniku, sé miðað við að hún hætti í golfi um fertugsaldurinn líkt og Annika gerði.

Inbee er nr. 1 á Rolex-heimslista kvenna, þ.e. langbesti kvenkylfingur heims.

Aðrir frægir kylfingar sem eiga afmæli í dag eru:  Paul Runyan, f. 12. júlí 1908- d. 17. mars 2002;  Robert Allenby 12. júlí 1971 (42 ára); Alexander Norén, 12. júlí 1982 (31 árs);  Sophie Giquel-Bettan, 12. júlí 1982 (31 árs); Isabella Ramsay (sænsk) 12. júlí 1987 (26 ára) …… og …….

Golf 1 óskar afmæliskylfingunum og öðrum kylfingum sem afmæli eiga í dag innilega til hamingju með afmælið!Ef þið viljið koma að afmælisgrein eða láta afmæliskylfings getið í upptalningu kylfinga, sem eiga afmæli hafið samband við golf1@golf1.is