Ragnheiður Jónsdóttir | júní. 23. 2013 | 11:30

Afmæliskylfingur dagsins: Colin Montgomerie – 23. júní 2013

Afmæliskylfingur dagsins er skoski atvinnukylfingurinn Colin Stuart Montgomerie. Monty eins og hann er oft kallaður er fæddur 23. júní 1963  og á því 50 ára stórafmæli í dag!! Hann á metið i því að vera efstur á stigalista Evrópumótaraðarinnar 8 ár, þar af 7 ár í röð þ.e. á árunum 1993-1999. Monty hefir unnið samtals 40 sinnum á atvinnumannsferli sínum, þar af 31 sinnum á Evrópumótaröðinni, sem kemur honum í 4. sæti yfir þá sem unnið hafa flesta titla á þeirri mótaröð.

Monty er einn þeirra sem aldrei hefir unnið risamótstitil og olli það nokkrum deilum þegar hann var þrátt fyrir það tekinn í frægðarhöll kylfinga á þessu ári.

Á móti kemur að Ryder Cup ferill Monty er með þeim glæsilegri  (20-9-7) en hann hefir tekið þátt 8 sinnum með liði Evrópu og var fyrirliði sigurliðs Evrópu 2010.  Hann komst ekki í Ryder Cup lið Nick Faldo 2008, en Faldo er sá eini (með 1,5 stiga forskot) sem er með betri árangur en Monty í Rydernum.

Monty hefir alltaf þótt mikill kvennamaður og hefir í gegnum tíðina allt eins verið í fréttum golffréttamiðla fyrir það og íþróttafrek sín.  Hann var kvæntur Eimear Wilson (1990-2006) og á með henni 3 börn: Olivia, Venetia og Cameron. Núverandi eiginkona hans er Gaynor Knowles (frá 2008).

Nokkuð sérstakt við Monty er að hann er flughræddur og reynir alltaf að keyra ef hann kemur því við fremur en að fljúga.

Aðrir frægir kylfingar, sem eiga afmæli í dag eru:

 
Kári Sölmundarson, GO (43 ára)

Ben Sayers, 23. júní 1856; Samuel McLaughlin Parks, Jr., 23. júní 1909; Lawson Little, 23. júní 1910; Flory Van Donck, 23. júní 1912 (hefði átt 101 ára afmæli í dag); David Howell, 23. júní 1975 (38 ára); Roberto Castro, 23. júní 1985 (28 ára).

Golf 1 óskar afmæliskylfingnum og öðrum kylfingum sem afmæli eiga í dag innilega til hamingju með afmælið!

Ef þið viljið koma að afmælisgrein eða láta afmæliskylfings getið í upptalningu kylfinga, sem eiga afmæli hafið samband við golf1@golf1.is