Afmæliskylfingur dagsins: Birgir Björn Magnússon – 12. maí 2013

Afmæliskylfingur dagsins er Birgir Björn Magnússon, GK. Birgir Björn er fæddur 12. maí 1997 og á því 16 ára afmæli í dag. Hann varð Íslandsmeistari í höggleik í flokki 14 ára og yngri stráka 2011. Birgir Björn innsiglaði Íslandsmeistaratitilinn með stæl 8. ágúst 2011, en hann setti nýtt vallarmet af rauðum í Grafarholtinu við það tækifæri spilaði á -7 undir pari, 64 glæsihöggum og fékk auk þess örn á par-5 15. braut Grafarholtsins, sem mörgum finnst ein erfiðasta golfbraut landsins.

Birgir Björn Magnússon að fara að slá aðhöggið á 15. braut fyrir erni. Hann lauk hringnum með skor upp á 64 högg og varð Íslandsmeistari 14 ára og yngri, 8. ágúst 2011, með glæsibrag! Mynd: Golf 1

Síðastliðið sumar, 2012, spilaði Birgir Björn bæði á Unglingamótaröðinni og Eimskipsmótaröðinni.  Hann byrjaði árið í fyrra á því að fara í æfingaferð með landsliðshópnum, völdum af Úlfari Jónssyni, til Eagle Creek í Flórída.  Um vorið 2012 fór Birgir Björn holu í höggi á 8. holu Garðavallar á Akranesi.

Birgir Björn Magnússon, GK við 8. holu á Garðavelli. Mynd: Magnús Birgisson

Birgir Björn varð í 5. sæti á 1. móti Unglingamótaraðar Arion banka á Garðavelli; síðan varð hann í 3. sæti á á 2. móti Unglingamótaraðar Arion banka. á Þverárvelli, 3. júní 2012.

Síðan náði Birgir Björn þeim glæsilega árangri að landa 7. sætinu á Finish International Junior Championship, sem fram fór 27.-29. júní 2012.

Birgir Björn varð í 2. sæti í Íslandsmótinu í höggleik 15-16 ára drengja, í mótinu í Kiðjaberginu:

Sigurvegarar á Íslandsmóti unglinga í höggleik í drengjaflokki 15-16 ára: Birgir Björn Magnússon, GK, varð í 2. sæti; Gísli Sveinbergsson, GK, Íslandsmeistari í höggleik í drengjaflokki; Ernir Sigmundsson, 3. sæti. Mynd: golf.is

Birgir Björn varð síðan Íslandsmeistari í holukeppni 2012:

Íslandsmeistarinn í holukeppni í drengjaflokki, Birgir Björn Magnússon, GK, f.m.; Aron Snær Júlíusson, GKG, t.v. hlaut 2. sætið og Óðinn Þór Ríkharðsson, GKG, t.h.i hlaut 3. sætið. Mynd: gsimyndir.net

Loks varð Birgir Björn Íslandsmeistari sveitakeppni GSÍ í drengjaflokki með A-sveit Keilis:

Íslandsmeistarar í sveitakeppni GSÍ í flokki 15 ára og yngri drengja – A-sveit Golfklúbbsins Keilis í Hafnarfirði, skipuð 4 Íslandsmeisturum. F.v. : Atli Már Grétarsson, Helgi Snær Björgvinsson, Birgir Björn Magnússon (heldur á Íslandsmeistaraverðlaunagripnum), Henning Darri Þórðarson og Gísli Sveinbergsson. Lengst til vinstri er liðsstjóri og þjálfari drengjanna Sigurpáll Geir Sveinsson. Mynd: gagolf.is

Birgir á ekki langt að sækja golfhæfileikana, en foreldrar hans eru Magnús Birgisson, golfkennari MP Academy og Ingibjörg Guðmundsdóttir.  Birgir Björn á tvo bræður Sindra og Pétur.  Komast má á síðu afmæliskylfingsins til þess að óska honum til hamingju með daginn hér að neðan

Birgir Björn Magnússon, GK. Mynd: Í einkaeigu

Birgir Björn Magnússon (16 ára – Innilega til hamingju með afmælið!!!)

Aðrir frægir kylfingar sem eiga afmæli í dag eru:  Amy Benz, 12. maí 1962 (51 árs); Steven Conran, 12. maí 1966 (47 ára); Andrew Coltart, 12. maí 1970 (43 ára); Mike Malizia, 12. maí 1970 (43 ára); Jim Furyk 12. maí 1970 (43 ára); Mike Weir 12. maí 1970 (43 ára) …… og …….

Elsa Björk Knútsdóttir (55 ára)

Jenetta Bárðardóttir (64 ára)