Afmæliskylfingur dagsins: Santiago Luna 29. nóvember 2011

Það er spænski kylfingurinn Santiago Luna sem er afmæliskylfingur dagsins. Santiago fæddist 29. nóvember 1962 í Madríd á Spáni og er því 49 ára í dag. Pabbi Luna var starfsmaður í Puerta de Hierro Golf Club í Madríd og þar steig Santiago sín fyrstu spor í golfíþróttinni. Hann gerðist atvinnumaður árið 1982 og var meira en 20 ár á Evrópumótaröðinni, þar sem hann spilaði í meir en 500 mótum. Hann var meðal efstu 100 á lista þeirra bestu í Evrópu (Order of Merit) oftar en 12 sinnum, en besti árangur hans var 31. sætið árið 1998. Eini sigur hans á Evrópumótaröðinni er Madeira Island Open, 1995, en hann er með 10 sigra í allt á atvinnumannsferli sínum. Eins var hann annar af liðstvennd Spánar á Heimsbikarsmótinu 1999, þegar Spánn varð í 2. sæti.

Aðrir frægir kylfingar sem eiga afmæli í dag eru m.a.: Perry Parker, 29. nóvember 1964 (47 ára); Guy Hill, 29. nóvember 1970 (41 árs);  Tonya Gill, 29. nóvember 1970 (41 árs).

Ef þið viljið koma að afmælisgrein eða láta afmæliskylfings getið í upptalningu kylfinga, sem eiga afmæli hafið samband við golf1@golf1.is