Ragnheiður Jónsdóttir | september. 18. 2014 | 00:45

Af málaferlum Rory við Horizon umboðsskrifstofuna

Rory McIlroy og Horizon umboðsskrifstofan eru í miðjum málaferlum, sem snerta m.a. $100 milljóna samning Rory við Nike.

Horizon heldur því m.a. fram að sér beri hluti af þessum samningi, en Rory fer fram á að umboðssamningur sinn við Horizon verði dæmdur ógildur, vegna þess að Horizon hafi ekki gegnt skyldum sínum gagnvart honum.

Lögmenn Rory hafa m.a. farið  fram á heimild til þess að fá í hendur gögn um samskipti og samning Graeme McDowell við Horizon og var beiðni um það sent réttinum s.l. þriðjudag.

Horizon heldur því fram að þeir séu enn lögmætir umboðsmenn Rory, sbr. umboðssamning, sem hann undirritaði við skrifstofuna í desember 2011 og telja sig auk þess eiga rétt á umboðslaunum nokkur ár fram í tímann.

Horizon heldur því fram að  Rory hafi þegar unnið sér inn $ 70milljónir s.l. 2 ár á grundvelli samninga, sem umboðsskrifstofan hafi haft umsjón með að koma á, en Rory hafi neitað að greiðs skrifstofunni þóknun frá því í ársbyrjun 2013.

Rory heldur því á hinn bóginn fram að þegar hann hafi undirritað samninga við Horizon þá hafi sér verið sagt að hann væri á svipuðum samingi og McDowell, en hafi síðan komist að því að skilmálar í samningi hans hjá Horizon hafi verið „allverulega lakari.“

Horizon heldur því fram að Rory hafi aldrei verið tjáð að hann væri á svipuðum samningi og McDowell, þannig að átökin milli Rory og Horizon virðast vera að harðna ef eitthvað er.

Horizon telur að Rory sé aðeins að nota bellibrögð til þess að komast hjá því að greiða umboðsskrifstofunni þá þóknun, sem henni beri.

Eins heldur skrifstofan því fram að Rory hafi eyðilagt mikilvæg gögn sem séu miklvæg í málinu. Heldur skrifstofan því þannig fram að Rory hafi krafist að samskiptin við skrifstofuna færi fram gegnum farsíma og hann hafi eytt gögnum í síma sínum frá janúar til maí 2013.

Horizon neitar því að samningur Rory hafi verið „verulega verri“ en sá sem gerður var við GMac. Lögmenn umboðsskrifstofunnar segja í báðum samningum sé kveðið á um að Horizon hljóti 20% af allri innkomu kylfinganna beggja.

Horizon hefir aftur stefnt Rory og fer nú fram á skaðabætur vegna samningsbrota.

Málið, sem er hið áhugaverðasta í alla staði, verður tekið fyrir seint í janúar 2015.