Af kylfingum og kylfusveinum

Fréttir af kylfingum að veitast að kylfusveinum sínum hafa gengið fjöllunum hærra nú á síðustu misserum.

Á lokahring Travelers mótsins þegar Bubba Watson missti sigurinn úr höndum sér á síðustu holunum var kylfuberinn húðskammaður.  Aumingja maðurinn gat bara ekki gert neitt rétt, m.a. hreytir Bubba í hann hvort hann sé nú að gefa honum upp réttu fjarlægðirnar?  Ömurlegt að þurfa að verða vitni að svona framkomu kylfinga gagnvart kylfusveinum sínum.  Sjá má myndskeiðið af Bubba á Travelers með því að SMELLA HÉR: 

Skrefinu lengra gekk þó bandarísk-tékkneski kylfingurinn Jessica Korda sem tók þátt í Opna bandaríska kvenmótinu (US Women´s Open) nú um helgina.   Hún hreinlega rak kylfusveininn sinn, Jason Gilroyed á miðjum lokahring US Women´s Open risamótsins eftir 9 holur og kærestinn tók við pokanum. Ástæðu brottrekstursins sagði Korda að hún hefði verið orðin ansi leið á eilífum deilum við Gilroyed um kylfuval. Þetta hefði bara verið farið að bitna á leik hennar og tími  kominn að hún skemmti sér svolítið á vellinum. Fyrri 9 á lokahring US Women´s Open var Korda á 40 höggum en eftir að kærestinn tók við 36.  Korda lauk keppni á risamótinu á samtals 2 yfir pari og varð T-7 í mótinu.

Það þarf að fara allt aftur til Opna breska 2001 til þess að finna kylfings/kylfubera sögur, þar sem kylfingar missa stjórn á skapi sínu vegna einhvers sem kylfuberinn á að hafa gert á stærstu mótaröðunum. A.m.k. sögur,  sem hafa vakið jafnmikla athygli og framangreindar tvær.

Þegar Tiger rak Steve  Williams 2011, var það ekki vegna einhvers sem Williams hafði gert, a.m.k. var það ekki opinbera skýringin

Atvikið á Opna breska 2001 er auðvitað þegar Ian Woosnam lét skap sitt bitna á kylfubera sínum, Miles Byrne, eftir að sá athugaði ekki að í poka Woosnam voru 15 en ekki leyfilegar 14 kylfur og Woosnam hlaut 2 högg í víti, sem var heldur betur afdrifaríkt.  Sjá má myndskeið af atvikinu með því að SMELLA HÉR: 

Eftir á sagði Woosnam að hann bæri ábyrgðina á því að réttur kylfufjöldi væri í pokanum sínum, en ekki kylfuberinn og hann gaf Byrnes  sjéns …. þ.e. Woosnam var ekkert að reka Byrne. Hins vegar fór Byrne (kylfuberinn)  illa með þetta tækifæri  á Scandinavian Open það ár, þegar hann mætti allt of seint og þunnur á teig og þá var þolinmæðin Woosy á þrotum.