Adam Scott með fjórfaldan skolla á Players

Golf getur verið grimm íþrótt.

Það fékk einn kynþokkafyllsti karlkylfingur allra tíma, Adam Scott, að reyna á 1. hring Players Championship í gær.

Hann spilaði seinni 9 á TPC Sawgrass fyrst og lenti í þvílíkum vandræðum á par-4 18. brautinni, sem er 456 yarda/ 416 metra.

Þegar hann kom að 18. braut (9. braut hans á hringnum) var hann í ágætis málum og á samtals 1 undir pari.

Síðan setti hann dræv sín tvívegis í vatnið og var þar með kominn með 4 högg; þurfti síðan 2 önnur högg: 3. drævið/fimmta högg hans var  297 yarda/271 metra; aðhöggið (6. höggið) var 150 yarda/137 metra og síðan tvípúttaði hann, niðurstaðan: snjókerling 8 júmbóhögg á eina holu og Scott lauk fyrri 9 á 3 yfir pari.

Til að bæta gráu ofan í svart kom ausandi rigning, sem varði í 4 klukkustundir eftir þessi skemmtilegheit og Scott hefir því þurft að díla við skollaskrattann allan tímann í hausnum í sér, sem hefir eflaust ekki verið skemmtilegt.

Þetta er í 2. sinn á 6 árum, sem Scott fær fjórfaldan skolla og það á þessari braut – þessi 18. braut á TPC Sawgrass er einfaldlega ekki braut Scotts!!!

Já, en þetta er sami maður og sigraði á Players 2004 – en, eins og sagði í upphafi: golfið getur verið grimmt.

Adam Scott lék 1. hring á heilum 78 höggum og er í einu af neðstu sætunum á Players.