Eimskipsmótaröðin (4): Kristján Þór Einarsson er Íslandsmeistari í holukeppni 2014!!!

Kristján Þór Einarsson, GkJ, vann Íslandsmeistaratitilinn í holukeppni 2014, nú síðdegis á gamla heimavelli sínum, en Kristján Þór þekkir Hvaleyrina mjög vel; varð m.a. klúbbmeistari Keilis 2012 s.s. mörgum er í fersku minni, eftir eitt lengsta umspil í sögu klúbbsins og rifja má upp með því að SMELLA HÉR: 

Þetta ár 2012 urðu Kristján Þór  og Tinna Jóhannsdóttir, GK einmitt bæði klúbbmeistarar Keilis  og í dag eru þau Íslandsmeistarar í holukeppni á vellinum, sem þau þekkja svo vel!

Kristján Þór og Tinna – Íslandsmeistarar í holukeppni 2014! Mynd: Golf 1

Segja má að Kristján Þór sé vel að sigrinum kominn því hann sigraði besta/forgjafarlægsta kylfing Íslands, sjálfan Birgi Leif Hafþórsson, GKG, í 8 manna úrslitum, 2&0 og síðan Harald Franklín Magnús, GR í undanúrslitum í morgun, 2&1.

Kristján Þór Einarsson, GKJ með fyrsta högg dagsins kl. 7:30 þ. 29. júní 2014 – daginn sem hann varð Íslandsmeistari í holukeppni 2014. Mynd: Golf 1

Í viðureigninni við Harald Franklín átti Kristján Þór m.a. glæsihögg á 17. braut inn á flöt og lenti boltinn aðeins nokkrum metrum frá fána, þannig að teighögg Kristjáns var a.m.k. 250 metra. Hann missti örninn, en Haraldur gat ekki jafnað við fuglapúttið, sem tryggði Kristján Þór í úrslitaviðureignina við Bjarka Pétursson, GB.

Kristján Þór vann síðan úrslitaviðureignina við Bjarka 2&1, þar sem þeir skiptust á um forystuna, en Kristján Þór hafði að lokum betur.

Þetta er ekki í fyrsta sinn sem Kristján Þór vinnur Íslandsmeistaratitilinn í holukeppni en hann vann titilinn fyrst árið 2009 þegar hann bar sigurorð af Einari Hauki Óskarssyni, GOB, í úrslitum.

Kristján Þór er fæddur 11. janúar 1988 og er því 26 ára. Hann byrjaði í golfi 10 ára, árið 1998 og hefir með stuttri viðkomu í Keili alla tíð verið í Golfklúbbnum Kili í Mosfellsbæ.   Kona Kristjáns Þórs er Marý Valdís Gylfadóttir og þau eiga eina dóttur.