Ragnheiður Jónsdóttir | apríl. 27. 2014 | 10:00

GA: Vorverkin hafin að Jaðri

Nú er nóg að gera hjá Steindóri og Daniel á Jaðarsvelli; vorverkin komin á fullt með hækkandi sól.

Flatirnar eru búnar að vera alveg auðar í talsverðan tíma og þ. 23. apríl s.l. var borið á þær í annað sinn.  Einnig var kveikt á vökvunarkerfinu og þær vökvaðar eftir áburðargjöfina.  Það hefur verið mikill þurrkur undanfarið og því nauðsynlegt að koma vatni á þær.

Staðan á vellinum er heilt yfir mjög góð.  Það er ennþá þónokkur snjór á vellinum en hann fer minnkandi dag frá degi í veðurblíðunni sem hefur herjað á Akureyri undanfarna daga.

Eins og þetta horfir núna þá eru einungis tvær flatir, sem eru illa farnar, annað lítur mjög vel út.  Þessar flatir eru sjöunda og átjánda og verður sett allt kapp í að koma þeim í stand sem fyrst.

Stefnt er að því að halda vinnudag þann 10 maí næstkomandi og eru GA-félagar beðnir að taka daginn frá og koma og hjálpa til á golfvellinum.

Margar hendur vinna létt verk! 🙂