Alex Salmond forsætisráðherra Skotlands gagnrýndur fyrir of háa Ryder Cup hótelreikninga

Alex Salmond, forsætisráðherra Skota, er maður með ákveðnar skoðanir á ýmsu tengdu golfi.  M.a. er hann ötull talsmaður að konur eigi að eiga rétt á við karla að ganga í hvaða golfklúbb sem er.  Golfklúbbar ættu að hans mati að gæta jafnræðis hvað þetta atriði snertir. Hann mætti m.a. ekki á Opna breska s.l. sumar á Muirfield í mótmælaskyni, þar sem klúbburinn leyfir konum ekki að gerast félagar í klúbbnum, einn fjölmargra klúbba Skotlands, sem enn halda í þessa fornfálegu reglu.

Það nýjasta varðandi Alex Salmond er að hann sætir gagnrýni í skoska þinginu af hálfu Johanns nokkurs Lamont verkalýðsforingja, fyrir að hafa gist í hóteli í Bandaríkjunum (The Peninsula í Chicago), þar sem nóttin kostaði $ 2.000,- (þ.e. u.þ.b. 240.000 íslenskar krónur nóttin).  Eru Skotar nískir eða hvað?

The Peninsula í Chicago

Það hefir farið vel um Salmond í Peninsula

Segir m.a. um hótelið að þar gisti stjörnur á borð við kylfinginn Justin Bieber og Beyoncé og sagði Lamont að „almenningur í Skotlandi myndi hrylla við hvernig forsætisráðherrann lifði á þeirra kostnað.“

Salmond var í 17 manna skoskri nefnd sem fór á Ryder Cup í Medinah í Chicago, 2012 og sagði Lamont að öll nefndin hefði gist á mun ódýrari hóteli, en forsætisráðherrann. Tilgangurinn var m.a. að kynna Skotland sem golfáfangastað og Ryder keppnina, sem fram mun fara í ár á Gleneagles.

Salmond svaraði því til að ferðin hefði hvað sig snerti ekki bara snúist um Ryder Cup, heldur hefði hann tekið þátt í allskyns fundum til þess að laða fjárfesta til Skotlands.

Síðan sagði Salmond: „Hvað snertir fjárfestingar í Skotlandi þá var ferðin 10 milljón punda virði og skapaði störf í mörgum landshlutum Skotlands.“  Umræður, sem hann hefði t.d. staðið í, í ferðinni um olíu- og gasleit undan ströndum Skotlands, hefði einnig skilað sér í fleiri störfum fyrir Skota.

„Ástæðan fyrir því að þessi stjórn er við völd er vegna þess að við einbeitum okkur að því sem máli skiptir fyrir almenning í Skotlandi,“ sagði Salmond.  „Það er atvinnuuppbygging og vöxtur – en ekki þetta fáránlega  fánýti  (ens. ridiculous frippery) sem við fáum að heyra í Johann Lamont.“