Caroline sagði frá hvernig Rory bar sig að við bónorðið

Caroline Wozniacki sagði frá því í gær, mánudaginn 6. janúar 2014, hvernig nr. 6 á heimslistanum,  Rory McIlroy hefði borið sig að við bónorðið, sem hann bar upp í Sydney, Ástralíu í síðustu viku, en hún sagði að hann hefði venju samkvæmt beðið foreldra hennar, Piotr og Önnu um hönd hennar.

„Það er frábært að hafa allt í föstum skorðum í einkalífinu og við getum þá virkilega einbeitt okkur að leikjunum í íþróttagreinum okkar, sem við hlökkum mjög til,“ sagði Wozniacki m.a. skv. frétt í AAP.

Caroline sagði að það væri kostur að vera með öðrum íþróttamanni.

„Það er frábært að hafa einhvern sem skilur mann og er alltaf þarna til að styðja mann,“ sagði hún. „Ég hugsa að það sé bara að hann skilur hvernig það er að vera atvinnumaður. Allar væntingarnar og hæðirnar og lægðirnar og hversu frábær tilfinning það er þegar maður sigrar og hversu erfitt það er þegar maður gerir það ekki.“

Rory keppir í fyrsta móti sínu 2014 í Abu Dhabi, 16.-19. janúar n.k.