Kokrak fékk ás á par-4 holu

Jason Kokrak er einn högglengsti kylfingur PGA mótaraðarinnar bandarísku, en hann slær að meðaltali 300 metra í upphafshöggum sínum í mótum PGA Tour.

Kokrak er meðal keppenda á McGladreys mótinu, sem hófst í gær og fer fram á Seaside golfvellinum á Sea Island í Georgíu-ríki í Bandaríkjunum.

Kokrak tók m.a. þátt í Pro-Am mótinu, sem er oftast haldið fyrir mótið og viti menn hann fór holu í höggi á 409 yarda (374 metra) par-4 5. holu Seaside vallarins; en líkurnar á að slá draumahöggið á par-4 holu eru 1 á móti milljón.

Til þess að setja hlutina í eitthvert samhengi þá er par-4 5. brautin á Seaside golfvellinum næstum jafnlöng og par-4 13. brautin á Hvaleyrinni (af hvítum teigum, en 13. er þó 1 cm lengri – þ.e. 375 metra). Hugsa sér að fara holu í höggi þar!!!

Þetta er í 4. sinn sem Kokrak fer holu í höggi og í fyrsta skipti sem hann nær þeim áfanga að fá samtímis albatross þ.e. fá ás á par-4 holu, sem er afar sjaldgæft, jafnvel meðal atvinnumanna.

Af íslenskum kylfingum sem tekist hefir að fara holu í höggi á par-4 braut mætti geta Ástu Birnu Magnúsdóttur úr Golfklúbbnum Keili. Ásta Birna fékk fór holu í höggi/fékk albatross á 3. braut á Hvaleyrinni, í  Siggu&Timo móti, 25. ágúst 2007. Ásta lék af rauðum teigum en brautin, sem er par-4, er 205 metra löng þaðan.

En víkjum aftur að Kokrak.  Sá var að vonum ánægður með afrekið og tvítaði eftirfarandi mynd af sér við holuna góðu á Sea Island:

Jason Kokrak við 5. holu Seaside golfvallarins á Sea Island í Georgíu, þar sem hann náði þeim glæsilega áfanga að fara holu í höggi á par-4 braut!