Ólafur Björn í 20. sæti fyrir lokhring úrtökumótsins í Hardelot

Ólafur Björn Loftsson, NK, tekur þátt í 1. stigi úrtökumóts fyrir Evrópumótaröðina, sem fram fer í Hardelot, Frakklandi (heimavelli Andreu Ásgrímsdóttur, golfkennara).

Ólafur Björn er búinn að leika fyrstu þrjá hringi mótsins á samtals 2 undir pari, 212 höggum (73 67 72).

Til þess að sjá stöðuna í úrtökumótinu í Hardelot eftir 3. dag SMELLIÐ HÉR: 

Á facebook síðu sína ritaði Ólafur Björn:

„Lék þriðja hringinn á 72 (+1) höggum í Frakklandi í dag. Ég er nokkuð sáttur við spilamennskuna en það var erfitt að spila þar sem það rigndi hressilega á okkur á hringnum. Leik var síðan frestað rétt áður en lokahollið náði að klára. Ég sló betur í dag og hitti fleiri flatir í tilætluðum höggafjölda en á fyrstu tveimur hringjunum. Hlutirnir gengu til skiptis með og á móti mér í dag en ég hefði viljað sjá nokkur pútt detta á síðustu holunum sem voru mjög nálægt því. Ég var að pútta vel á hringnum en það var töluvert erfiðara að meta hraðann þar sem flatirnar urðu fljótt mun hægari í bleytunni. Ég hélt þolinmæðinni vel á degi þar sem auðvelt var að spila sig út úr mótinu.

Ég stend í stað milli hringja, er jafn í 20. sæti og í fínum málum fyrir lokahringinn. Leikskipulagið verður áfram það sama, það er spáð miklum vindi á morgun og því mikilvægt að halda boltanum í leik. Svo er það bara eins og alltaf að gera mitt allra besta og hafa gaman að því að spila golf.

Fer líklega út um 10 leytið á staðartíma í fyrramálið.“